दसैंको अग्रिम टिकट बुकिङ मौसम हेरेर मात्र खुल्ने

यातायात व्यवस्था विभागले दसैँका लागि अग्रिम टिकट बुकिङ मौसमको अवस्था हेरेर मात्र खुलाउने भएको छ। असोज ९ देखि ११ गतेसम्म देशका अधिकांश भू-भागमा भारीदेखि धेरै भारी वर्षाको पूर्वानुमानका कारण विभागले यो तयारी गरेको हो। विभागका अधिकारी गणेशमान सिं राईका अनुसार देशभर लगातार पानी परिरहेकाले मौसम अनुकूल भएपछि मात्र बुकिङबारे थप छलफल हुनेछ।

आगामी तीन-चार दिन सडकको अवस्था मूल्याङ्कन गरी सरोकारवालासँग छलफलपछि निर्णय गरिने उहाँले बताउनुभएको छ। नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलाका अनुसार बुकिङ खुलाउनेबारे असोज ५ गते सरोकारवालाबीच छलफल भएको थियो। जल तथा मौसम विज्ञान विभागका अनुसार आज कोशी, बागमती, गण्डकी र लुम्बिनी प्रदेशका थोरै स्थानमा र मधेशका एक-दुई स्थानमा भारीदेखि धेरै भारी वर्षा हुन सक्छ।

भोलि कर्णालीसहित पाँच प्रदेशका थोरै स्थानमा भारीदेखि धेरै भारी तथा लुम्बिनी र गण्डकीका एक-दुई स्थानमा अति भारी वर्षाको सम्भावना छ। आज काठमाडौँमा मेघगर्जनसहित भारी वर्षाको ८० प्रतिशत सम्भावना रहेको विभागले जनाएको छ। नेपाल आयल निगमका अनुसार काठमाडौँ, पोखरा र दिपायलमा पेट्रोल र डिजेल प्रतिलिटर २०० रुपैयाँ छ।