पत्रकारलाई ओलीको आग्रह: प्रश्न सोध्नुअघि अनुमति लिनुस्

नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले पत्रकारहरूलाई प्रश्न सोध्नुअघि अनुमति लिन आग्रह गर्नुभएको छ। ललितपुरको च्यासलस्थित एमाले केन्द्रीय कार्यालयमा आइतबार निर्वाचन समीक्षा तथा पार्टी पुनर्गठन कार्यदलको बैठकपछि बाहिरिने क्रममा सञ्चारकर्मीसँग कुरा गर्दै उहाँले यस्तो भन्नुभएको हो। संसारभरको पत्रकारितामा प्रश्न गर्नुअघि सम्बन्धित व्यक्तिसँग सोध्न मिल्छ कि मिल्दैन भनेर अनुमति लिने अभ्यास रहेको उहाँको दाबी छ।

भनाइ प्रकाशित गर्नुअघि पनि सम्बन्धित व्यक्तिलाई जानकारी गराउने अन्तर्राष्ट्रिय अभ्यास रहेको उहाँले बताउनुभएको छ। अनुमति नलिई माइक अगाडि ल्याएर प्रश्न गर्ने प्रवृत्ति रोक्नुपर्ने उहाँको भनाइ छ। पत्रकारले बुम नजिकै ल्याएर असहज ढङ्गले प्रश्न गर्ने गरेको भन्दै उहाँले सभ्य ढङ्गले प्रस्तुत हुन आग्रह गर्नुभयो।

समाचारका लागि प्रश्न गर्दा पनि पत्रकारले सम्बन्धित व्यक्तिलाई भनाइ पुष्टि गर्ने अवसर दिनुपर्ने उहाँको धारणा छ। दिउँसो १ बजेका लागि तोकिएको एमाले सचिवालय बैठक समयमा सुरु नभएपछि ओली करिब आधा घण्टा पार्टी कार्यालयमा बसेर बाहिरिनुभएको थियो। उक्त बैठक दिउँसो ३ बजेका लागि सारिएको छ।

सञ्चारकर्मीले कार्यदल, पार्टी पुनर्गठन र पछिल्लो आन्तरिक विवादबारे प्रश्न गर्न खोजेका थिए।