एसियाली खेलकुद: महिला भलिबलमा नेपाल आयोजक जापानसँग पराजित

जापानमा जारी २०औँ एसियाली खेलकुदको महिला भलिबलमा नेपाल आयोजक जापानसँग ३–० सेटले पराजित भएको छ। आइचीको कोमाकी सहरमा बुधबार भएको समूह ए को पहिलो खेलमा जापानले पहिलो सेट २५–८ ले जितेको छ। दोस्रो सेटमा नेपालले केही सुधार गरे पनि २५–१२ ले गुमाएको छ भने तेस्रो सेट जापानले २५–११ ले जितेको छ।

अन्तर्राष्ट्रिय भलिबल महासंघको विश्व वरीयतामा नेपाल ६९औँ स्थानमा छ भने जापान एसियाकै शीर्ष वरीयताको टोली हो। नेपालले बिहीबार समूहको दोस्रो खेलमा विश्व वरीयताको ५३औँ स्थानमा रहेको इन्डोनेसियासँग खेल्नेछ। महिला भलिबलमा चार समूहमा विभाजित १४ टोली सहभागी छन् भने प्रत्येक समूहका शीर्ष दुई टोली क्वार्टरफाइनलमा पुग्नेछन्।

समूह ए मा जापान, नेपाल र इन्डोनेसिया गरी तीन टोली छन्। इन्डोनेसियालाई हराए नेपालको क्वार्टरफाइनल पुग्ने सम्भावना रहनेछ भने पराजित भए स्थान निर्धारणका खेल खेल्नुपर्नेछ। एसियाली खेलकुदमा यो नेपाली महिला भलिबल टोलीको लगातार दोस्रो सहभागिता हो।

टोलीले सन् २०२३ मा चीनको हाङझाउमा भएको १९औँ संस्करणमा पहिलोपटक प्रतिस्पर्धा गरेको थियो। औपचारिक उद्घाटनअघि नै केही खेलका प्रारम्भिक चरण सुरु भइसकेका छन्। नेपालले यस संस्करणमा २१ विधामा प्रतिस्पर्धा गरिरहेको छ।