नेपाल–बंगलादेशबीच मार्चमा तीन खेलको टी–२० सिरिज

नेपाल र बंगलादेशबीच आगामी चैतमा तीन खेलको अन्तर्राष्ट्रिय टी-ट्वान्टी सिरिज हुने भएको छ। नेपाल क्रिकेट संघ क्यान र बंगलादेश क्रिकेट बोर्ड बीसीबीको संयुक्त पहलमा सिरिज आयोजना गर्न लागिएको क्यानका सचिव पारस खड्काले जानकारी दिएका छन्। उनले जारी गरेको विज्ञप्तिअनुसार पहिलो खेल सन् २०२७ मार्च २६ मा हुनेछ।

दोस्रो खेल मार्च २८ र तेस्रो खेल मार्च ३० मा तय गरिएको छ। तीनै खेल कीर्तिपुरस्थित त्रिभुवन विश्वविद्यालय क्रिकेट मैदानमा हुनेछन्। नेपालले बंगलादेशसँग द्विपक्षीय सिरिज खेल्न लागेको यो पहिलोपटक हो।

यसअघि दुई टोली सन् २०१४ र २०२४ का टी-ट्वान्टी विश्वकपमा भिडेका थिए, जहाँ दुवै खेल बंगलादेशले जितेको थियो। दुवै बोर्डले क्रिकेटलाई दुई देशका जनता जोड्ने माध्यम बनाउने बताएका छन्। यो सिरिजमार्फत हालैको बाढी विपद्बाट प्रभावित समुदायप्रति ऐक्यबद्धता जनाइने छ।

सहकार्य सिरिजमा मात्र सीमित नरहने क्यानले जनाएको छ। बीसीबीले नेपालमा महिला तथा उमेर समूहको क्रिकेट र क्षमता अभिवृद्धि कार्यक्रममा सहयोग गर्ने प्रतिबद्धता जनाएको छ। भविष्यमा नेपाल ए टोलीको भ्रमण तथा दुई देशका ए टोलीबीचका कार्यक्रमलाई पनि प्रोत्साहन गरिने विज्ञप्तिमा उल्लेख छ।