दसैँको मागसँगै कोरला नाकाबाट आयात र राजस्व बढ्यो

दसैँलाई लक्षित गर्दै मुस्ताङको कोरला नाकाबाट चीनसँगको आयात बढेको छ। भोटेकोशी नदीको बाढीका कारण रसुवागढी नाका बन्द भएपछि र चीनले तातोपानी नाका बन्द गरेपछि व्यापारीले कोरलाको बाटो रोजेका हुन्। भन्सार कार्यालय मुस्ताङका प्रमुख अधिकृत विदुर चुडालका अनुसार रेडिमेड कपडा, फलफूल र जुत्ताचप्पलसहित चाडपर्व तथा जाडो लक्षित सामानको आयात बढ्दो क्रममा छ।

कोरला नाकाबाट हाल दैनिक ५० देखि ७० कन्टेनरसम्म सामान भित्रिरहेको उहाँले जानकारी दिनुभएको छ। एकै दिनमा ८१ करोड रुपैयाँसम्म राजस्व उठेको र यो हालसम्मकै उच्च रहेको चुडालले बताउनुभएको छ। विद्युतीय गाडीको आयात पनि बढेको छ र नाका नजिकै हाल ५०० भन्दा बढी विद्युतीय गाडी रहेका छन्।

बाढीका कारण चीनको केरुङमा रोकिएका १७५ कन्टेनर सामान कोरला हुँदै नेपाल भित्रिसकेका छन्। चीनसँगको कारोबारमा प्रयोग हुने चिनियाँ युआनको विनिमय दर नेपाल राष्ट्र बैंकले खरिद २२ रुपैयाँ ८५ पैसा र बिक्री २२ रुपैयाँ ९४ पैसा कायम गरेको छ। अमेरिकी डलरको खरिद दर १५३ रुपैयाँ २४ पैसा र बिक्री दर १५३ रुपैयाँ ८४ पैसा रहेको छ।