सुरुङमार्ग चलेपछि नागढुङ्गा उकालो प्रायः सुनसान

नागढुङ्गा–सिस्नेखोला सुरुङमार्ग सञ्चालनमा आएपछि यस वर्षको दसैँमा नागढुङ्गा सडक प्रायः सुनसान बनेको छ। धादिङ र काठमाडौँ जोड्ने यो सुरुङमार्ग देशका करिब ६८ जिल्लाबाट संघीय राजधानी प्रवेश गर्ने मुख्य नाका हो। त्रिभुवन लोकमार्गअन्तर्गत पर्ने नागढुङ्गा उकालोमा विगतमा ठूला सवारीको धुवाँ, सडकको धुलो र लामो जाम हुने गर्थ्यो।

दसैँमा यात्रुको चाप हुँदा पनि अहिले यहाँ जामको सास्ती छैन र नागढुङ्गा चेकपोस्ट क्षेत्रसमेत शान्त भएको छ। घण्टौँसम्म गाडीभित्रै रोकिनुपर्ने बाध्यता हटेपछि यात्रुहरूले राहत महसुस गरेका छन्।