गण्डकी र कर्णालीका केही सडक अझै अवरुद्ध, बागलुङका सडक अस्थायी मर्मतपछि खुले; फापरखेत पहिरोमा मन्त्री पुनको चासो

नेपाल प्रहरीका अनुसार गण्डकी र कर्णाली प्रदेशका केही सडकखण्ड आज बिहान ६ बजेसम्म पनि पूर्ण वा आंशिक रूपमा अवरुद्ध छन्। गोरखाको आरुघाट गाउँपालिकामा असोज २५ गते आएको बाढीले सोतीको फलामे पुलमा क्षति पुर्‍याएपछि आरुघाट–धादिङ सडक प्रभावित भएको छ। वडा नं.

९ नयाँपुल क्षेत्रमा भने साना सवारीसाधन मात्र चलिरहेका छन्। सुर्खेतको बराहताल–७ औलिसेमा पहिरो खसेपछि कर्णाली राजमार्ग एकतर्फी मात्र सञ्चालनमा छ। बागलुङमा भने असोज ९ देखि ११ गतेसम्मको वर्षाले बिगारेका सडक अस्थायी मर्मतपछि खुलेका छन्।

सडक डिभिजन कार्यालय बागलुङका प्रमुख हरि सुवेदीका अनुसार मालढुङ्गा पुलको पहुँचमार्ग १५ दिनपछि र गलकोट–ताराखोला सडक १७ दिनपछि सुचारु भएका हुन्। मध्यपहाडी लोकमार्गको निसीखोलास्थित कानाबगर र झिवाखोलामा डाइभर्सन बनाएर यातायात चलाइएको छ। म्याग्दीमा विज्ञान, प्रविधि तथा नवप्रवर्तन मन्त्री महावीर पुनले शनिबार बेनी–दरबाङ सडकको फापरखेत पहिरो निरीक्षण गर्नुभएको छ।

यो पहिरो म्याग्दीको पश्चिमी क्षेत्रका तीन स्थानीय तहलाई सदरमुकाम बेनीसँग जोड्ने सडकको मुख्य चुनौती बनेको छ। सङ्घीय सरकारले पहिरो नियन्त्रणका लागि चालु आर्थिक वर्षमा ४ करोड रुपैयाँ छुट्याएको र बर्खाअघि नै जोखिमपूर्ण आवतजावत अन्त्य गरिने मन्त्री पुनले बताउनुभएको छ।