एसियाडमा नेपाललाई पहिलो पदक: करातेमा तेन्जिङ शेर्पालाई कांस्य

जापानमा जारी बीसौँ एसियाली खेलकुदमा नेपालले पहिलो पदक जितेको छ। कराते खेलाडी तेन्जिङ शेर्पाले पुरुष कुमिते ८४ केजीमाथिको तौल समूहमा कांस्य पदक हात पारेका हुन्। तोयोहाशी जिम्नेसियममा बुधबार भएको कांस्य पदकको निर्णायक भिडन्तमा उनले लाओसका वात्थाना जायासनलाई ९–१ को अन्तरले पराजित गरेका हुन्।

यसअघि सेमिफाइनलमा उनी इरानका महमुद नेमातीसँग ०–५ ले पराजित भएका थिए। पदकको भिडन्तमा उनले १ इप्पोनसहित ९ अङ्क बटुलेका थिए। क्वार्टरफाइनलमा मकाउका खेलाडीविरुद्ध पछि परेका तेन्जिङलाई प्रतिद्वन्द्वीले नियमविपरीत खेलेपछि रेफ्रीले हाङसोकु दिँदा सेमिफाइनलको बाटो खुलेको थियो।

रिपिचेजमार्फत उनी पदकको भिडन्तसम्म पुगेका हुन्। यसअघि करातेमा नेपाली खेलाडी कांस्य पदकका चारवटा निर्णायक भिडन्तमा चुकेका थिए। गत संस्करणमा रजत जितेर इतिहास रचेकी एरिका गुरुङ यसपटक कांस्य पदकको भिडन्तमा चुकेकी थिइन्।

जारी संस्करणमा नेपालको समग्र प्रदर्शन भने उत्साहजनक रहेको छैन। बुधबारकै बक्सिङमा खगेन्द्र रोका मगरले मकाउका एल्भिन जोनलाई हराउँदै जित निकालेका छन्। महिला कबड्डी टोलीले समूह चरणको पहिलो खेलमा थाइल्यान्डलाई हराएको थियो।

बुधबार बेलुका महिला कबड्डी टोलीले चिनियाँ ताइपेइसँग खेल्ने र बिहीबार समूह चरणको अन्तिम खेलमा श्रीलंकासँग भिड्ने कार्यक्रम छ। महिला भलिबलमा पनि नेपालले एउटा खेलमा जित निकालेको छ। क्रिकेट टोली शुक्रबार अफगानिस्तान र शनिबार जापानसँग भिड्नेछ।