एसियाड बक्सिङ: खगेन्द्र रोकामगर अन्तिम १६ मा

जापानमा जारी बीसौँ एसियाली खेलकुदको बक्सिङमा नेपालले पहिलो जित निकालेको छ। खगेन्द्र रोका मगरले पुरुष ६० केजी तौल समूहको प्रारम्भिक भिडन्तमा मकाउका एल्भिन जोन रेयेस सालिनासलाई ५–० को सर्वसम्मत निर्णयले हराएका हुन्। यो जितसँगै उनी अन्तिम १६ मा प्रवेश गरेका छन्।

आइचीस्थित निशिओ जिम्नेसियममा बुधबार भएको प्रतिस्पर्धामा पाँचै निर्णायकले खगेन्द्रकै पक्षमा निर्णय दिएका थिए। यसअघि रिङमा उत्रिएका नेपालका तीनै खेलाडी प्रारम्भिक चरणबाटै बाहिरिएका थिए। पुरुष ५५ केजीमा चन्द्रबहादुर थापा मंगलबार भारतका जदुमनी सिंह मन्देङबामसँग ५–० ले पराजित भएका थिए।

चन्द्रमाथि नेपालले कम्तीमा कांस्य पदकको आशा गरेको थियो। पुरुष ७० केजीमा दानबहादुर दर्लामी सोमबार इराकका अली कासिम हमदान अल–सर्रेसँग ५–० ले पराजित भएका थिए। महिला ५१ केजीमा रमिशा श्रेष्ठलाई भियतनामकी न्गुएन थि तामले उही अन्तरले हराएकी थिइन्।

सुरुका पराजयपछि नेपालको पदक सम्भावना खुम्चिएको चर्चा चलेको थियो। लगातार तीन पराजयपछि खगेन्द्रले दिलाएको जितले नेपालको बक्सिङ अभियानलाई अगाडि बढाएको छ। बुधबारै करातेको पुरुष कुमिते ८४ केजीमाथिको तौल समूहमा तेन्जिङ शेर्पाले कांस्य पदक जित्दै नेपालको पदक खाता खोलेका छन्।

करातेको महिला टिम कातामा भने नेपाल चिनियाँ ताइपेइसँग ५–० ले पराजित भएको छ।