बाढी–पहिरोबाट पूर्वाधारमा २ खर्ब २७ अर्बको क्षति, पुनर्निर्माणका लागि तत्काल ६३ अर्ब आवश्यक

पछिल्लो बाढी, पहिरो तथा जलवायुजन्य विपद्का कारण देशका पूर्वाधार संरचनामा २ खर्ब २७ अर्ब रुपैयाँ बराबरको प्रारम्भिक क्षति पुगेको छ। पूर्वाधार विकास मन्त्रालयका सचिव पद्मकुमार मैनालीले यस्तो जानकारी दिएका हुन्।

क्षति भएका संरचनाको पुनर्निर्माणका लागि तत्काल ६३ अर्ब रुपैयाँ आवश्यक पर्ने मन्त्रालयले जनाएको छ। क्षतिको यो आँकडा प्रारम्भिक अनुमान भएको सचिव मैनालीले बताएका छन्।

पछिल्ला दिनमा देशका विभिन्न भागमा आएको बाढी र पहिरोले सडक, पुललगायतका पूर्वाधारमा क्षति पुर्‍याएको छ। सरकारले क्षतिको विवरण संकलन गर्दै पुनर्निर्माणका लागि आवश्यक रकम माग गरेको हो।

जलवायुजन्य विपद्का कारण पूर्वाधारमा परेको असर र पुनर्निर्माणको आवश्यकताबारे मन्त्रालयले २० असोजमा यो विवरण सार्वजनिक गरेको हो।