कांग्रेसको वडा अधिवेशन ६३ जिल्लामा सम्पन्न, बाँकीमा अन्तिम चरण

नेपाली कांग्रेसको १५औँ महाधिवेशनअन्तर्गतको वडा अधिवेशन ६३ जिल्लामा सम्पन्न भएको पार्टीले जनाएको छ। सोमबार सार्वजनिक केन्द्रीय कार्यसमितिको विज्ञप्तिमा असोज ३ गतेदेखि सुरु भएको वडा अधिवेशन तेस्रो दिनसम्म उत्साहजनक रूपमा अघि बढेको उल्लेख छ। ताप्लेजुङदेखि कञ्चनपुरसम्म फैलिएका सम्पन्न जिल्लामा सातै प्रदेशका अधिकांश जिल्ला परेका छन्।

पूर्वका ताप्लेजुङ, पाँचथर, इलाम, सङ्खुवासभा, तेह्रथुम, धनकुटा, झापा, सुनसरी र उदयपुरदेखि मधेसको बारा तथा बागमतीका दोलखा, रामेछाप, सिन्धुली, काभ्रेपलाञ्चोक र चितवनमा वडा अधिवेशन पूरा भइसकेको छ। केन्द्रीय निर्वाचन समितिका सदस्यसचिव राजु कटुवालका अनुसार मोरङ क्षेत्र नम्बर ६, धनुषा क्षेत्र नम्बर ४, नवलपरासी क्षेत्र नम्बर २, सप्तरी क्षेत्र नम्बर २ र ४, रौतहट क्षेत्र नम्बर १, सर्लाही क्षेत्र नम्बर २ र सिरहाका वडामा अधिवेशन अन्तिम चरणमा पुगेको छ। अछामका ३, डडेल्धुराका ४, रुपन्देहीका ३ र महोत्तरीका ८ वडामा पनि अधिवेशन सकिने क्रममा रहेको उहाँले बताउनुभएको छ।

रसुवा, धादिङ, नुवाकोट र सोमबारसम्म टुङ्गो नलागेका अन्य वडामा मङ्गलबार, असोज ६ गते पनि अधिवेशन चल्ने समितिले जनाएको छ। कांग्रेसको १५औँ केन्द्रीय महाधिवेशन केन्द्रीय कार्यसमितिको निर्णयअनुसार असोज १६ देखि १९ गतेसम्म काठमाडौँमा हुँदैछ।