पहाड–हिमालमा बदली र छिटपुट हल्का वर्षा, तराईमा आंशिक बदली

जल तथा मौसम विज्ञान विभागले आज कोशी, बागमती, गण्डकी, कर्णाली र सुदूरपश्चिम प्रदेशका पहाडी भेगमा सामान्यतया बदली रहने पूर्वानुमान गरेको छ। कोशी र बागमतीका हिमाली क्षेत्रमा पनि बदली रहनेछ भने कर्णाली र सुदूरपश्चिमका हिमाली भागमा आंशिक बदली हुने विभागले जनाएको छ। तराईमा आंशिक बदली रहने र हिमाल तथा पहाडका केही ठाउँमा हल्का वर्षा वा हिमपात हुन सक्ने उल्लेख छ।

विभागका अनुसार मनसुनको न्यून चापीय रेखा सामान्य स्थानको वरिपरि छ र देशभर मनसुनी तथा पश्चिमी वायुको आंशिक असर परेको छ। भोलि भने कोशी र बागमतीका हिमाली र पहाडी भागका एक–दुई ठाउँमा मात्र हल्का वर्षा वा हिमपातको सम्भावना छ। गण्डकी, लुम्बिनी, कर्णाली र सुदूरपश्चिमका हिमाली र पहाडी भागमा भोलि आंशिक बदली रहनेछ।

प्रमुख सहरमध्ये जनकपुरमा तापक्रम ३४ देखि ३६ डिग्री सेल्सियससम्म पुग्ने अनुमान छ। विराटनगर र नेपालगञ्जमा ३३ देखि ३५ डिग्री तापक्रम रहनेछ र त्यहाँ वर्षाको सम्भावना छैन। काठमाडौँमा २८ देखि ३० डिग्री तापक्रम रहने र २० प्रतिशत सम्भावनासहित मेघगर्जनसँगै हल्का वर्षा हुन सक्ने विभागले जनाएको छ।

पोखरामा ३० देखि ३२ डिग्री तापक्रम रहनेछ र वर्षाको सम्भावना ३० प्रतिशत छ। वीरेन्द्रनगरमा ३१ देखि ३३ डिग्री तापक्रम र २० प्रतिशत वर्षाको सम्भावना रहेको छ।