अमेरिकी गाडी उद्योगमा उत्पादन र लगानी विस्तारको ट्रम्पको दाबी

अमेरिकी राष्ट्रपति डोनाल्ड ट्रम्पले आफ्नो व्यापार नीतिका कारण देशको गाडी उद्योगमा उत्पादन र लगानी बढेको दाबी गर्नुभएको छ। उद्योगका जानकारहरूका अनुसार केही क्षेत्रमा सुधार देखिए पनि नीतिगत अनिश्चितताले कम्पनीहरूलाई अप्ठ्यारोमा पारेको छ। ट्रम्पको पछिल्लो कार्यकालमा जनरल मोटर्स, टोयोटा र फोर्डजस्ता ठूला कम्पनीले अमेरिकी कारखाना विस्तार गर्ने र विदेशको केही उत्पादन स्वदेश फर्काउने योजना ल्याएका छन्।

सञ्चार माध्यमका अनुसार आयातित गाडीमा करिब २५ प्रतिशत शुल्क लागेपछि केही कम्पनीले देशभित्रका कारखानाको क्षमता बढी प्रयोग गर्ने तयारी गरेका छन्। गाडी उद्योगकी विश्लेषक स्टेफनी ब्रिन्लीका अनुसार आयात शुल्कले उद्योगलाई केही फाइदा पुर्‍याएको छ। तर व्यापार नीति बारम्बार फेरिँदा कम्पनीहरू दीर्घकालीन लगानीको निर्णयमा सतर्क भएको उहाँले बताउनुभएको छ।

अमेरिका र क्यानडाबीच चलिरहेको व्यापार वार्ताले पनि उद्योगमा अन्योल थपेको छ। होन्डाले उत्तर अमेरिकाका आफ्ना कारखाना उच्च क्षमतामा चलिरहेको र नयाँ कारखाना बनाउने सम्भावनाबारे विचार भइरहेको जनाएको छ। आयात शुल्क र विद्युतीय गाडीसम्बन्धी सरकारी नीतिमा आएको परिवर्तनले पार्टपुर्जा उत्पादक कम्पनीलाई पनि असर गरेको छ।

सञ्चार माध्यमका अनुसार पार्टपुर्जा क्षेत्रमा करिब ९ लाख ३० हजार मानिस काम गर्छन्। अमेरिकी श्रम तथ्याङ्कअनुसार सन् २०२६ को सेप्टेम्बरमा गाडी उद्योगमा करिब १८ लाख मानिस कार्यरत थिए।