एनपीएल तेस्रो संस्करणको तयारी: विराटनगर किंग्स भारतमा प्रशिक्षणरत, टोलीहरूका नयाँ साझेदारी

नेपाल प्रिमियर लिग, एनपीएलको तेस्रो संस्करणको तयारीका लागि विराटनगर किंग्स भारतको उत्तर प्रदेशस्थित पूर्वाञ्चल क्रिकेट एकेडेमीमा प्रशिक्षणरत छ। असोज १३ देखि सुरु भएको प्रशिक्षणमा कप्तान सन्दीप लामिछानेबाहेक सबै खेलाडी सहभागी छन्। लामिछाने ओमानमा जारी आईसीसी विश्वकप लिग–२ शृङ्खलाका लागि राष्ट्रिय टोलीसँग हुनुहुन्छ।

लोकेश बम असोज २५ देखि टोलीमा जोडिनुहुनेछ। टोलीले रणजी ट्रफी खेलेका भारतीय खेलाडीविरुद्ध फ्लडलाइटमा अभ्यास खेल खेलिरहेको छ। मुख्य प्रशिक्षक धम्मिका प्रसादले भारतमा प्रशिक्षण राम्रो भइरहेको बताउनुभएको छ।

स्पिन बलिङ प्रशिक्षक दिनुका सुलक्षणाले पनि टोलीलाई प्रशिक्षण दिइरहनुभएको छ। यसैबीच काठमाडौँ गोर्खाजले क्लाउड एजुकेसन भिसासँग र जनकपुर बोल्ट्सले आइजीआई प्रुडेन्सियल इन्स्योरेन्ससँग साझेदारी गरेका छन्। गोर्खाजको साझेदारीले क्रिकेट प्रवर्द्धनमा निजी क्षेत्रको सहभागिता बढाउने लक्ष्य लिएको छ।

सम्झौताअनुसार जनकपुर बोल्ट्सका नेपाली खेलाडी, प्रशिक्षक र कर्मचारीको खेल अवधिमा बीमा गरिनेछ। सम्झौतामा बीमा कम्पनीका प्रमुख कार्यकारी अधिकृत युगेशभक्त बादे श्रेष्ठ र बोल्ट्सका महाप्रबन्धक निरोज खतिवडाले हस्ताक्षर गर्नुभएको छ।