पहुँचमार्ग भासिएपछि मनकामना केबलकार सेवा बन्द

चितवनको इच्छाकामना गाउँपालिका–४ चेरेसस्थित मनकामना केबलकार परिसरभित्रको सडक भासिएको छ। निरन्तर वर्षापछि त्रिशूली नदीले धार बदलेर किनार कटान गर्दा केबलकारको गेटदेखि भित्रतर्फको सडक भासिएको हो। नदीको बहावले चेरेसबाट गोरखाको सहिद लखन गाउँपालिका–३ सिलिङटार जोड्ने झोलुङ्गे पुलमा पनि लगातार ठक्कर दिइरहेको छ।

पृथ्वी राजमार्गको मुख्य सडक चर्किएको इच्छाकामना–४ का वडाध्यक्ष रुद्र उप्रेतीले बताउनुभएको छ। उहाँका अनुसार सडक भासिएपछि केबलकार सेवा बन्द छ र आसपासको क्षेत्रमा थप जोखिम बढेको छ। मनकामना केबलकारले भने केबलकार आफैँ पूर्ण रूपमा सुरक्षित रहेको जनाएको छ।

केबलकारको सूचनाअनुसार पहुँचमार्गको दोस्रो घुम्तीमुनि पहिरो खसेकाले सवारीसाधन पुरानो पार्किङस्थलसम्म पुग्न सक्दैनन्। यात्रुले त्यहाँबाट पैदल मार्ग प्रयोग गर्नुपर्नेछ। पूर्वतर्फबाट आउने यात्रुका लागि राजमार्गको देब्रे भागमा मुग्लिनतर्फ करिब ७० मिटर अघि वैकल्पिक पार्किङ बनाइएको केबलकारले जनाएको छ।

चितवन कोई समूहका कार्यकारी निर्देशक राजेशबाबु श्रेष्ठले केबलकार चलाउन कुनै बाधा नरहेको बताउनुभएको छ। उहाँका अनुसार राजमार्ग खुलेर यात्रु आउनेबित्तिकै सेवा चल्नेछ। मौसम अनुकूल भएपछि सडक मर्मत छिटो अघि बढाइने केबलकारले जनाएको छ।

जल तथा मौसम विज्ञान विभागका अनुसार आज गण्डकी प्रदेशका साथै बागमती प्रदेशको तराई भू-भागका एक-दुई स्थानमा भारी वर्षाको सम्भावना छ।