वीरगन्ज र मुस्ताङ भन्सारको राजस्व सङ्कलन विवरण सार्वजनिक

वीरगन्ज भन्सार कार्यालयले चालु आर्थिक वर्ष २०८३–८४ को भदौ महिनामा करिब २३ अर्ब ४६ करोड रुपैयाँ राजस्व सङ्कलन गरेको छ। यो कार्यालयलाई दिइएको मासिक लक्ष्यको करिब ९९.७५ प्रतिशत हो। भदौ मसान्तसम्मको सङ्कलनले वार्षिक राजस्व लक्ष्यको करिब १४.५२ प्रतिशत पूरा भएको कार्यालयका प्रवक्ता पूर्णप्रसाद लम्सालले जानकारी दिनुभएको छ।

उपल्लो मुस्ताङको लोमान्थाङ गाउँपालिका–४ नेचुङमा रहेको मुस्ताङ भन्सार कार्यालयले दुई महिनामा करिब ३ अर्ब ७ करोड रुपैयाँ राजस्व उठाएको छ। भन्सार कार्यालय प्रमुख बिदुर चुडालका अनुसार साउनमा करिब २६ करोड ३९ लाख रुपैयाँ रहेको सङ्कलन भदौमा बढेर करिब २ अर्ब ८१ करोड रुपैयाँ पुगेको छ। भोटेकोशी नदीमा गत भदौ १० गते आएको बाढीले रसुवाको टिमुरेस्थित रसुवागढी भन्सार बगाएपछि कोरला नाकाबाट आयात बढेको हो।

चीनबाट साउनमा करिब १०० विद्युतीय सवारीसाधन भित्रिएकोमा भदौमा बढेर करिब १ हजार २ सय २३ पुगेको चुडालले बताउनुभएको छ। दुई महिनाको अवधिमा विद्युतीय सवारीसाधन, घरायसी सामान, कस्मेटिक, विद्युतीय उपकरण, कपडा र जुत्तालगायत चाडपर्व लक्षित सामान बोकेका कन्टेनरबाट राजस्व उठेको भन्सार कार्यालयले जनाएको छ। अहिले चीनबाट आउने सामान तिब्बत हुँदै लिजी–नेचुङ मार्गबाट भित्रिने गरेको छ।

रसुवा विपद्पछि मुस्ताङमा आन्तरिक तथा बाह्य पर्यटकको आगमन भने साउनको तुलनामा भदौमा घटेको जिल्ला प्रहरी कार्यालयको तथ्याङ्कले देखाएको छ।