एमाले बैठक अपडेट: एकताको माग र संसद् पुनर्स्थापना आन्दोलनबारे मतभिन्नता

नेकपा एमालेको केन्द्रीय कमिटी बैठक ललितपुरको रामबाग महलमा तीन दिनदेखि जारी छ। केन्द्रीय सदस्य प्रदीप ज्ञवालीले एमाले, कम्युनिस्ट आन्दोलन, लोकतन्त्र र मुलुक नै असाधारण सङ्कटमा रहेको भन्दै समाधानका लागि राष्ट्रिय एकता र पार्टी एकता आवश्यक रहेको बताएका छन्। त्यस्तो एकताको अगुवाइ एमालेले नै गर्नुपर्ने उनको भनाइ छ।

राष्ट्रिय स्वतन्त्र पार्टी पपुलिज्म र अराजकताको जगमा उभिएकाले दीर्घकालमा असफल हुने दाबी गर्दै ज्ञवालीले रास्वपा असफल भएकै भरमा एमाले स्वतः सफल नहुने बताएका छन्। एमालेलाई सत्ता र प्रमुख प्रतिपक्ष दुवै भूमिकाबाट बाहिर राख्ने प्रयास भइरहेको उनको आरोप छ। पार्टी पुनर्गठनको बहस तल्लो तहसम्म पुग्दा ध्रुवीकरण बढेको उल्लेख गर्दै उनले आफूले छद्म रूपमा प्रतिवेदन लेख्नुपर्ने आवश्यकता नरहेको स्पष्ट पारेका छन्।

सबैभन्दा धेरै अवसर पाएका नेता नै असन्तुष्ट देखिनुको कारणबारे पनि उनले प्रश्न उठाएका छन्। केन्द्रीय सदस्य रचना खड्काले प्रतिनिधि सभा पुनर्स्थापनाका लागि आन्दोलनलाई मुख्य कार्यभार बनाउनु पार्टीका लागि आत्मघाती हुने चेतावनी दिएकी छन्। पार्टीको खस्कँदो जनमतको निर्मम समीक्षा हुनुपर्नेमा उनको जोड छ।

केन्द्रीय सदस्य विष्णु रिजालले नेपाली सेनाप्रति पार्टीको दृष्टिकोण के हो भन्ने विषय स्पष्ट पार्न माग गरेका छन्। वीरेन्द्रनगरकी मेयरसमेत रहेकी मोहनमाया ढकालले स्थानीय तहको निर्वाचनको तयारीमा एकताबद्ध भएर जुट्न आग्रह गरेकी छन्। केन्द्रीय सदस्य डा.

भिष्म अधिकारीले विदेशमा रहेका नेपालीलाई वंशजको नागरिकता दिने विषयमा पार्टी सकारात्मक हुनुपर्ने बताएका छन्।