बक्यौता असुलीमा कडाइ र चुस्त सेवा: ऊर्जामन्त्रीको प्राधिकरणलाई निर्देशन

ऊर्जा, जलस्रोत तथा सिँचाइमन्त्री विराजभक्त श्रेष्ठले नेपाल विद्युत् प्राधिकरणलाई उद्योगहरूको बक्यौता असुलीमा कडाइ गर्न निर्देशन दिनुभएको छ। शनिबार कुलेखानी जलाशयको निरीक्षणका क्रममा उहाँले यस्तो निर्देशन दिनुभएको हो। मन्त्री श्रेष्ठका अनुसार हेटौँडा औद्योगिक क्षेत्रमा करिब ४० मेगावाट बिजुलीको माग आएको छ।

उहाँले उक्त माग सम्बोधन गर्न र बक्यौता नतिरेका उद्योगलाई परिपत्रमार्फत ताकेता गर्न भन्नुभएको छ। आपूर्तिको समस्याभन्दा समयमै जानकारी नपाउँदा नागरिकमा आक्रोश बढेको उल्लेख गर्दै उहाँले सूचना प्रवाह सुधार्न निर्देशन दिनुभएको छ। हेटौँडास्थित प्राधिकरणको बागमती प्रदेश डिभिजन कार्यालयमा भएको छलफलमा मन्त्रीले मौसमी खराबीले लाइन अवरुद्ध वा ट्रिप हुँदा ग्राहकलाई समयमै सही सूचना दिन र वितरण कार्यालयले समस्या तत्काल समाधान गर्न भन्नुभएको छ।

डिजिटल भुक्तानी, लोड व्यवस्थापन, चुहावट नियन्त्रण र पूर्वाधारको नियमित मर्मतमा विशेष ध्यान दिन पनि उहाँले निर्देशन दिनुभएको छ। विपद्का बेला बिजुली सेवा पुनः सुचारु गर्न कर्मचारीले गरेको कामको उहाँले प्रशंसा गर्नुभएको छ। सेवा सुधारका प्रयास सकारात्मक भए पनि धेरै काम अझै बाँकी रहेको उहाँको भनाइ छ।