सेयर कारोबार अवरोधबारे सेबोनले माग्यो प्रतिवेदन, कारोबार खुल्ने तयारी

नेपाल धितोपत्र बोर्डले सेयर कारोबार रोकिनुपर्ने अवस्थाबारे अध्ययन गरी असोज १२ गतेभित्र प्रतिवेदन बुझाउन नेपाल स्टक एक्सचेन्जलाई निर्देशन दिएको छ। ९२ ब्रोकरमध्ये ७२ वटाको सर्भर रहेको डेटा हब प्रालिको डेटा सेन्टरमा र्‍यान्समवेयर आक्रमण भएपछि सोमबार दिनभर सेयर कारोबार स्थगित गरिएको हो। बोर्डले त्यस्तो घटना फेरि नदोहोरियोस् भनेर गर्नुपर्ने सुधारका उपाय पनि प्रतिवेदनमा समेट्न भनेको छ।

कारोबार रोक्नुपर्ने वास्तविक कारण खोज्न बोर्डले ५ सदस्यीय निरीक्षण टोली गठन गरेको छ, जसको नेतृत्व बोर्डका उपकार्यकारी निर्देशकले गरेका छन्। आक्रमण आइतबार बिहान वाइको कम्पनीले विकास गरेको कारोबार व्यवस्थापन प्रणाली राखिएको पूर्वाधारमा भएको हो। डेटा हबले आक्रमणअघि आइतबार बिहान करिब ४ बजे लिइएको ब्याकअप सुरक्षित र छुट्टै राखिएको जनाएको छ।

र्‍यान्समवेयर जोडिएका अन्य सञ्जालमा फैलिएको हुन सक्ने आशङ्कामा प्रभावित प्रणाली तत्काल नचलाइएको र सुरक्षा परीक्षण भइरहेको डेटा हबको भनाइ छ। समस्या नसुल्झिँदै कारोबार चलाउँदा नेप्सेकै कारोबार प्रणालीमा क्षति पुग्न सक्ने देखिएकाले कारोबार रोकिएको नेप्सेले जनाएको छ। स्टक ब्रोकर्स एसोसिएसन अफ नेपालका उपाध्यक्ष नितेशकुमार अग्रवालले डेटा सफा गर्ने काम सकिएकाले मंगलबारदेखि कारोबार गर्न सकिने जानकारी आएको बताउनुभएको छ।