एसियाड अपडेट: महिला भलिबल टोली समूह चरणबाटै बाहिर

जापानको आइचीमा जारी २०औँ एसियाली खेलकुदको महिला भलिबलमा नेपाल समूह चरणबाटै बाहिरिएको छ। समूह ‘ए’ अन्तर्गत बिहीबार भएको खेलमा नेपाल इन्डोनेसियासँग ३–० को सोझो सेटमा पराजित भएको हो। आइचीस्थित पार्क एरिना कोमाकीमा भएको खेलमा नेपालले पहिलो सेट २५–१२ र दोस्रो सेट २५–२१ ले गुमायो, तेस्रो सेट पनि गुमाएपछि नेपालको अन्तिम आठ पुग्ने यात्रा टुंगिएको छ।

यसअघि बुधबार भएको पहिलो खेलमा आयोजक जापानले पनि नेपाललाई सोझो सेटमा हराएको थियो। तीन टोली मात्र रहेको समूह ‘ए’ बाट जापान र इन्डोनेसिया क्वार्टरफाइनलमा प्रवेश गरेका छन्। अब नेपालले वरीयता निर्धारणका लागि प्लेअफ खेल्नेछ, प्रतिस्पर्धी टोलीको टुंगो भने लाग्न बाँकी छ।

महिला भलिबलतर्फ १४ टोली चार समूहमा विभाजित भई प्रतिस्पर्धा गरिरहेका छन् र प्रत्येक समूहका शीर्ष दुई टोली मात्र क्वार्टरफाइनल पुग्नेछन्। विश्व वरीयतामा नेपाल ६९औँ, इन्डोनेसिया ५३औँ र जापान छैटौँ स्थानमा छन्। सन् २०२३ मा चीनको हाङ्झाउमा भएको १९औँ एसियाली खेलकुदमा नेपालले ११औँ स्थान हासिल गरेको थियो।

यस संस्करणमा नेपालका १३५ खेलाडी २१ खेलमा सहभागी छन्। औपचारिक उद्घाटन शनिबार हुने भए पनि लामो समय चल्ने केही खेलको लिग चरण सुरु भइसकेको छ।