दुई महिनामा बैंकहरूको कर्जा प्रवाह र नाफा बढ्यो

चालु आर्थिक वर्ष २०८३/८४ को साउन र भदौ महिनामा वाणिज्य बैंकहरूको कर्जा लगानी करिब ६१ अर्ब रुपैयाँले बढेको छ। बैंकहरूको तथ्याङ्क अनुसार भदौ मसान्तसम्म कुल कर्जा एक प्रतिशतभन्दा केही बढीले वृद्धि भई करिब ५३ खर्ब ५१ अर्ब रुपैयाँ पुगेको छ। यस अवधिमा सबैभन्दा धेरै कर्जा विस्तार गर्ने ग्लोबल आईएमई बैंकले करिब २० अर्ब रुपैयाँ थप लगानी गर्दै कुल कर्जाको आकारमा नबिल बैंकलाई उछिनेको छ।

एभरेष्ट बैंकले करिब १३ अर्ब र लक्ष्मी सनराइज बैंकले करिब १० अर्ब रुपैयाँ कर्जा बढाएका छन्। कर्जा घटेका बैंकमध्ये एनआईसी एशिया बैंकको लगानी सबैभन्दा बढी करिब ६ अर्ब ७० करोड रुपैयाँले घटेको छ। नेपाल बैंकर्स संघका अध्यक्ष सन्तोष कोइरालाले चाडपर्वका लागि उपभोग्य वस्तुको आयात बढेकाले कर्जाको माग केही सुध्रिएको बताउनुभएको छ।

नयाँ परियोजनाका लागि भने कर्जाको माग अझै नबढेको बैंकरहरूले जनाएका छन्। यसैगरी साउन महिनामा वाणिज्य बैंकहरूको खुद नाफा अघिल्लो वर्षको सोही अवधिभन्दा करिब ४ प्रतिशत बढेर करिब ८ अर्ब ७३ करोड रुपैयाँ पुगेको छ। कोषको लागत घटेर ब्याज आम्दानी बढेकाले नाफामा सुधार आएको छ।

नबिल बैंकले सबैभन्दा धेरै करिब ८८ करोड रुपैयाँ नाफा कमाएको छ। नेपाल बैंक, राष्ट्रिय वाणिज्य बैंक र एनआईसी एशियालगायतको नाफा भने घटेको छ।