एमाले सचिवालयले पुनर्गठन प्रतिवेदन स्वीकार्‍यो, राष्ट्रिय प्रतिनिधि परिषद् बोलाइने

नेकपा एमालेको सचिवालय बैठकले निर्वाचन समीक्षा तथा पार्टी पुनर्गठन कार्यदलले तयार पारेको प्रतिवेदन स्वीकार गरेको छ। ललितपुरको च्यासलस्थित केन्द्रीय कार्यालयमा आइतबार बसेको बैठकमा कार्यदल संयोजक एवं उपाध्यक्ष रामबहादुर थापा ‘बादल’ले प्रतिवेदन पेस गर्नुभएको थियो। उपमहासचिव लेखराज भट्टका अनुसार चार महिना लगाएर तयार पारिएको प्रतिवेदनलाई सचिवालयले सर्वसम्मत रूपमा ग्रहण गरेको छ।

प्रतिवेदनबाट नेतृत्वसम्बन्धी तथा मतभेद भएका विषय हटाइएको उहाँले बताउनुभएको छ। महासचिव शंकर पोखरेलका अनुसार बैठकले राष्ट्रिय प्रतिनिधि परिषद्को बैठक बोलाउने सहमति पनि गरेको छ। उपाध्यक्ष थापा र महासचिव पोखरेलले तयार पारेका छुट्टाछुट्टै मस्यौदालाई एकीकृत गरेर प्रतिवेदनलाई अन्तिम रूप दिइएको हो।

देशभरबाट प्राप्त सुझावलाई प्रतिवेदनको अनुसूचीमा राखिएको छ। सचिव महेश बस्नेतले प्रतिवेदनमा अध्यक्ष केपी शर्मा ओलीको राजीनामा माग्ने वा पदबाट हटाउने कुनै विषय नरहेको स्पष्ट पार्नुभएको छ। उमेर हद र कार्यकालसम्बन्धी विधान संशोधन नियमित विधान महाधिवेशनमा लैजाने समझदारी भएको उहाँको भनाइ छ।

गत जेठ १० गते बसेको सचिवालय बैठकले उपाध्यक्ष थापाको संयोजकत्वमा उक्त कार्यदल गठन गरेको थियो। एमालेको केन्द्रीय कमिटी बैठक सोमबारदेखि सुरु हुँदैछ। सचिवालय बैठक भने सोमबार बिहान ९ बजे पुनः बस्ने गरी स्थगित भएको छ।