सुस्तामा नारायणीको बाढी पस्यो, सशस्त्र प्रहरीले २९ जनालाई सुरक्षित निकाल्यो

नारायणी नदीको बाढी पश्चिम नवलपरासीको सुस्ता गाउँपालिका–५ का बस्तीमा पसेपछि सशस्त्र प्रहरीले २९ जनालाई सुरक्षित स्थानमा पुर्‍याएको छ। असोज ९ गतेदेखिको अविरल वर्षाले नदीको बहाव बढ्दा थारु टोलका घरमा पानी पसेको थियो। सशस्त्र प्रहरी बल बीओपी सुस्ताबाट शनिबार बिहान पौने ९ बजे परिचालित २१ सदस्यीय टोलीको नेतृत्व सशस्त्र प्रहरी निरीक्षक मनोज कार्कीले गर्नुभएको थियो।

टोलीले एउटा गाई र १३ वटा बाख्रा पनि जोगाएको छ। उद्धार गरिएका बासिन्दा र चौपायालाई सुस्ता–५ कै होल्डिङ सेन्टरमा राखिएको छ। यसअघि शुक्रबार दिउँसो थारु टोलका ७८ परिवार र राति सैनिक टोल तथा बड्की टोलका थप ८५ परिवारलाई सुरक्षित ठाउँमा सारिएको थियो।

प्रमुख जिल्ला अधिकारी दिपकराज नेपालका अनुसार जोखिम क्षेत्रबाट १६३ जनालाई स्थानान्तरण गरिएको छ। स्थानीयका भनाइमा करिब २५० घर डुबानमा परेका छन्, र प्रभावितहरू अग्लो ठाउँका छिमेकीको घर र सामुदायिक भवनमा बसेका छन्। गण्डक ब्यारेजमा शुक्रबार करिब ९२ हजार क्युसेक रहेको बहाव शनिबार करिब २ लाख ८० हजार क्युसेक पुगेको छ।

नदीको सतह अझै बढिरहेकाले सुस्ताका अन्य बस्ती पनि जोखिममा छन्।