एमाले केन्द्रीय कमिटीका निर्णय: भदौ २३–२४ को घटनामा न्यायिक आयोग माग, स्थायी कमिटीमा ७ मनोनीत

नेकपा एमालेको केन्द्रीय कमिटी बैठकले भदौ २३ र २४ गतेका घटनाको निष्पक्ष छानबिन गर्न सक्षम न्यायिक आयोग बनाउन सरकारसँग माग गरेको छ। ललितपुरको भनिमण्डलस्थित रामबाग महलमा असोज ५ देखि ८ गतेसम्म अध्यक्ष केपी शर्मा ओलीको अध्यक्षतामा बसेको तेस्रो बैठकका २२ वटा निर्णय महासचिव शङ्कर पोखरेलले विज्ञप्तिमार्फत सार्वजनिक गर्नुभएको छ। ती घटनाबारे यसअघि बनेका आयोगका प्रतिवेदन पूर्ण पाठसहित तुरुन्त सार्वजनिक गर्न पनि बैठकले माग गरेको छ।

सरकारले भदौ २४ को घटनाको छानबिन पन्छाउन खोजेको एमालेको आरोप छ। बैठकले अध्यक्ष ओलीको राजनीतिक प्रतिवेदन सर्वसम्मत पारित गरेको छ। पूर्वराष्ट्रपति विद्यादेवी भण्डारीलाई पार्टी नेतृत्वको दोस्रो वरीयतामा रहने गरी वरिष्ठ नेता बनाइएको छ।

ईश्वर पोखरेल, प्रदीप ज्ञवाली, काशीनाथ अधिकारी, देवराज घिमिरे, शिवमाया तुम्बाहाङ्फे, लालबाबु पण्डित र थममाया थापा गरी ७ जना स्थायी कमिटीमा मनोनीत हुनुभएको छ। अन्य दलबाट एमाले प्रवेश गरेका १३ जनासहित कुल ३३ जनालाई केन्द्रीय सदस्य बनाइएको छ। विज्ञप्तिमा पार्टीभित्रका असमझदारी यही बैठकदेखि अन्त्य भएको दाबी गरिएको छ।

उपमहासचिव योगेश भट्टराईका अनुसार अध्यक्ष ओलीले सम्मानजनक रूपमा नेतृत्व छोड्नुपर्ने प्रस्ताव बैठकले स्वीकार गरेन, यो विषयमा आगामी बैठकमा पनि छलफल हुनेछ। पार्टीको मुख्य काम अब स्थानीय तह निर्वाचनको तयारी हुने उहाँले बताउनुभएको छ।