इजिप्टमा स्वतन्त्र सञ्चारमाध्यमका ६ पत्रकार पक्राउ, अधिकारकर्मीको आपत्ति

इजिप्टका अधिकारीहरूले स्वतन्त्र सञ्चारमाध्यम मात्सादासका ६ जना पत्रकारलाई पक्राउ गरेका छन्। प्रतिबन्धित मुस्लिम ब्रदरहुडसँग सम्बन्ध रहेको र विदेशी रकम लिएर अनलाइनका लागि झुटा समाचार बनाएको आरोप उनीहरूमाथि लगाइएको छ। इजिप्टको गृह मन्त्रालयले मात्सादासलाई भारतबाट चल्ने अनुमतिविहीन माध्यम भन्दै पक्राउ परेकाहरू ब्रदरहुडको ‘मिडिया कमिटी’ सदस्य भएको दाबी गरेको छ।

मात्सादासका सहसंस्थापक अब्देलरहमान मन्सुरले सबै आरोप अस्वीकार गर्नुभएको छ। उहाँका अनुसार पत्रकारहरू सोमबार र मङ्गलबार फरक-फरक ठाउँबाट पक्राउ परेका हुन् र तिनका मोबाइल तथा कम्प्युटर जफत गरिएको छ। पत्रकारहरूलाई कहाँ राखिएको छ भन्ने जानकारी परिवारलाई समेत नदिइएको मन्सुरले बताउनुभएको छ।

अन्तर्राष्ट्रिय तथा क्षेत्रीय अधिकार समूहहरूले पत्रकारहरूलाई तुरुन्त छाड्न माग गरेका छन्। अरब मुलुकमा खोजमूलक समाचार दिँदै आएको मात्सादासको वेबसाइट इजिप्टमा अवरुद्ध छ, तर फेसबुकमा यसका १० लाखभन्दा बढी फलोअर छन्।