बागमतीमा मन्त्रिपरिषद् विस्तार, रमा आलेमगर कृषि तथा वनमन्त्री

बागमती प्रदेशमा मुख्यमन्त्री किरण थापामगर नेतृत्वको सरकारले मन्त्रिपरिषद् विस्तार गरेको छ। नेपाली कम्युनिस्ट पार्टी, नेकपाकी प्रदेशसभा सदस्य रमा आलेमगर नयाँ कृषि, पशुपन्छी, वन तथा वातावरण मन्त्री बन्नुभएको छ। मुख्यमन्त्री थापामगरले असोज २ गते शुक्रबार उहाँलाई मन्त्रीमा नियुक्त गर्नुभएको हो।

नियुक्ति भएकै दिन प्रदेश प्रमुख दीपकप्रसाद देवकोटाले उहाँलाई पद तथा गोपनीयताको शपथ गराउनुभएको छ। सत्तासाझेदार नेकपाले माग गरेअनुसार नै आलेमगरलाई यो मन्त्रालयको जिम्मेवारी सुम्पिएको हो। यो सरकारमा एमाले, नेपाली कम्युनिस्ट पार्टी र राष्ट्रिय प्रजातन्त्र पार्टीबीच सत्ता साझेदारी छ र मुख्यमन्त्री थापामगर एमालेका नेता हुनुहुन्छ।

आर्थिक मामिला तथा योजना मन्त्रालयको जिम्मेवारी भने सरल सहयात्री पौडेलले यसअघि नै पाइसक्नुभएको छ। आलेमगर काठमाडौँ जिल्लाको निर्वाचन क्षेत्र नम्बर १० अन्तर्गत प्रदेशसभा क्षेत्र (२) बाट प्रत्यक्ष रूपमा निर्वाचित सांसद हुनुहुन्छ। उहाँ यसअघि शालिकराम जमकट्टेल मुख्यमन्त्री रहँदा बागमती प्रदेश सरकारमा युवा तथा खेलकुदमन्त्री भइसक्नुभएको छ।