किसान महासङ्घको बैठकमा नेकपा नेताहरू: विदेशी चलखेलको चिन्ता, कृषिमा लगानीको माग

पूर्वप्रधानमन्त्री तथा नेपाली कम्युनिस्ट पार्टीका सहसंयोजक माधवकुमार नेपालले विदेशी चलखेलका कारण मुलुक गम्भीर सङ्कटमा परेको बताउनुभएको छ। काठमाडौँमा आज बसेको अखिल नेपाल किसान महासङ्घ केन्द्रीय समितिको पूर्ण बैठकमा बोल्दै उहाँले देश विदेशीको खेलमैदान बन्ने हो कि भन्ने आशङ्का व्यक्त गर्नुभएको छ। दुई ठूला छिमेकीबीच रहेको भूपरिवेष्टित देशले दुवैसँग सुमधुर सम्बन्ध राख्दै राष्ट्रिय स्वाभिमान जोगाउनुपर्ने उहाँको भनाइ छ।

गणतन्त्र, संविधान र सङ्घीयता ल्याउन आफूहरूले भूमिका खेलेकाले तिनको रक्षाको जिम्मा पनि आफूहरूकै काँधमा रहेको सहसंयोजक नेपालले बताउनुभएको छ। यी उपलब्धिको संरक्षण र सुदृढीकरणका लागि सबै पक्षको सहयोग चाहिने उहाँको भनाइ छ। सोही कार्यक्रममा नेकपाका संयोजक पुष्पकमल दाहाल प्रचण्डले तीव्र आर्थिक वृद्धिका लागि कृषिमा लगानी बढाउनुपर्ने बताउनुभएको छ।

दिगो कृषि अभ्यास किसानका लागि सबैभन्दा महत्त्वपूर्ण भएको भन्दै उहाँले किसानका दैनिक समस्या समाधान गर्नुपर्नेमा जोड दिनुभएको छ। उत्पादनलाई अनुकूल बनाउनु र खेती बढी लाभदायक बनाउनु अहिलेको ठूलो चुनौती रहेको उहाँले औँल्याउनुभएको छ। प्रविधिको प्रयोगबाट दिगो, वातावरणमैत्री र नाफामूलक खेती प्रवर्द्धन गरे कृषिको औद्योगिकीकरण सम्भव हुने र कृषि क्षेत्रले व्यापक रोजगारी सिर्जना गर्न सक्ने उहाँको भनाइ छ।