कांग्रेसको गाउँ–नगर अधिवेशन भोलिदेखि, सभापतिका दाबेदार सक्रिय

नेपाली कांग्रेसको १५औँ महाधिवेशनअन्तर्गत पालिका तहका अधिवेशन नजिकिँदा नगर नेतृत्वका लागि प्रतिस्पर्धा तीव्र भएको छ। वडा तहबाट क्षेत्रीय प्रतिनिधि चुनिइसकेकाले पालिका नेतृत्वका आकांक्षीहरू उनीहरूसँग मत माग्दै आन्तरिक समीकरण मिलाउन सक्रिय छन्। कोशी प्रदेशका ठूला सहरहरूमा असोज ६ र ७ गतेका लागि नगर अधिवेशन तय गरिएको छ।

शीर्ष तहमा शेरबहादुर देउवा समूहले छुट्टै कार्यतालिका अघि सारेको र डा. शेखर कोइराला समूहले असन्तुष्टि जनाइरहेको भए पनि अधिकांश नेता–कार्यकर्ता अधिवेशन प्रक्रियामा सहभागी भएका छन्। हेटौँडा उपमहानगरपालिकाको अधिवेशन भोलि असोज ७ गते बुधबारदेखि सुरु हुँदै छ।

हालका नगर सभापति उत्सव इटेनी माथिल्लो तहको उम्मेदवारीको तयारीमा लागेपछि त्यहाँ सभापतिका लागि कविन सांगामी र रामकृष्ण कोइराला आमनेसामने हुने भएका छन्। बागमती प्रदेश सभापति बानियाँ र निवर्तमान सहमहामन्त्री महालक्ष्मी उपाध्याय ‘डिना’ले सांगामीलाई समर्थन गर्नुभएको छ भने पूर्वनगरसभापति आनन्दराम पराजुलीले कोइरालालाई साथ दिनुभएको छ। यसैबीच उपसभापति पुष्पा भुसालले पार्टी नेतृत्वका लागि गगनकुमार थापाको विकल्प नभएको बताउनुभएको छ।

पूर्वउपसभामुखसमेत रहिसक्नुभएकी भुसालले आफू पनि पदाधिकारी पदमै प्रतिस्पर्धा गर्ने बताउनुभएको छ। उहाँले १५औँ महाधिवेशनलाई गुटबन्दी अन्त्य गर्ने एकताको महाधिवेशन बनाउनुपर्ने र मुलुकमा राजनीतिक स्थिरताका लागि दलहरू भित्रैबाट बलियो हुनुपर्नेमा जोड दिनुभएको छ।