बाढीले क्षतिग्रस्त जलविद्युत् संरचना पुनर्निर्माणमा करिब ३ खर्ब ९० अर्ब लाग्ने अनुमान

भोटेकोशी र त्रिशूली बाढीले क्षति पुर्‍याएका जलविद्युत् आयोजनाको पुनर्निर्माणमा करिब ३ खर्ब ९० अर्ब रुपैयाँ लाग्ने प्रारम्भिक अनुमान गरिएको छ। ऊर्जा, जलस्रोत तथा सिँचाइ मन्त्रालयका सहसचिव सुशीलचन्द्र आचार्यका अनुसार बाढीबाट प्रभावित ऊर्जा संरचनाको लगानी मूल्य करिब १ खर्ब २४ अर्ब रुपैयाँ थियो। जलवायु परिवर्तनका कारण मौसमजन्य विपद् बढ्दा त्यसको ठूलो असर ऊर्जा र जलस्रोत क्षेत्रमा परेको मन्त्रालयले जनाएको छ।

मन्त्रालयका अनुसार भदौ १० को बाढीले मात्र करिब ७८३ मेगावाट क्षमताका १४ जलविद्युत् आयोजनामा क्षति पुर्‍याएको छ। नेपाल विद्युत् प्राधिकरणका कार्यकारी निर्देशक दीर्घायु श्रेष्ठका अनुसार सो बाढीपछि माथिल्लो त्रिशूली ३ बी हबसहित विभिन्न केन्द्रमा क्षति पुग्दा करिब ४३० मेगावाट बिजुली प्रणालीबाहिर छ। उक्त क्षेत्रमा प्राधिकरण र सहायक कम्पनीहरूको करिब ७४ अर्ब रुपैयाँ क्षति पुगेको प्रारम्भिक अनुमान छ।

असोज ८ देखि ११ गतेसम्मको वर्षापछि म्याग्दीको दाना–कुश्मा प्रसारण लाइनका तीन टावरमा पहिरोले क्षति पुर्‍याउँदा थप करिब १८० मेगावाट प्रणालीबाहिर छ। यसरी कुल करिब ६१० मेगावाट उत्पादन बन्द भएको उहाँले बताउनुभएको छ। क्षतिको विस्तृत विवरण सङ्कलनसँगै सरकारले पुनर्निर्माणका लागि वित्तीय र नियामकीय मोडल बनाउने तयारी थालेको छ।