पश्चिम नवलपरासीमा ८० लाखभन्दा बढी मूल्यका मोबाइल पार्टस् बरामद

सशस्त्र प्रहरी बल, नेपालले लुम्बिनी प्रदेशको पश्चिम नवलपरासी जिल्लाबाट ८० लाख रुपैयाँभन्दा बढी मूल्यका मोबाइल फोनका पार्ट्स र अन्य इलेक्ट्रोनिक सामग्री बरामद गरेको छ। बलअन्तर्गतको सुरक्षा बेस सेमरीको टोलीले शुक्रबार राति करिब ११ बजेर ५५ मिनेटमा बर्दघाट नगरपालिका–४ मा रहेको एउटा झाडीबाट ती सामान फेला पारेको छ। सामान त्यहाँ अवैध रूपमा लुकाएर राखिएको भन्ने विशेष सूचनाका आधारमा सशस्त्र प्रहरी निरीक्षक जगनाथ पौडेलको नेतृत्वमा टोली खटाइएको थियो।

खोजतलासका क्रममा टोलीले फेला पारेका सामानमा मोबाइल फोनका ब्याट्री र स्क्रिनमा लगाइने टेम्पर्ड ग्लासजस्ता पार्ट्ससँगै इयरबड, स्मार्ट वाच र स्पिकरजस्ता सहायक उपकरण छन्। बरामद गरिएका सबै सामानको कुल मूल्य करिब ८० लाख ३० हजार रुपैयाँ रहेको सशस्त्र प्रहरी बलले जनाएको छ। सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार ती सबै सामान आवश्यक कारबाहीका लागि महेशपुर भन्सार कार्यालयलाई जिम्मा लगाइएको छ।