एसियाड महिला कबड्डी: श्रीलङ्कालाई हराउँदै नेपाल सेमिफाइनलमा, पदक पक्का

जापानको आइची-नागोयामा जारी २०औँ एसियाली खेलकुदको महिला कबड्डीमा नेपाल सेमिफाइनलमा पुगेको छ। यससँगै नेपालले कम्तीमा कांस्य पदक सुनिश्चित गरेको छ। बिहीबार तोकाइ सिटिजन व्यायामशालामा भएको समूह 'बी' को अन्तिम खेलमा नेपालले श्रीलङ्कालाई ३४–२५ अंकले पराजित गरेको हो।

पहिलो हाफमा नेपालले १९–१३ ले अग्रता लिँदै ६ अंकको फरक बनाएको थियो। दोस्रो हाफमा पनि नेपाल १५–१२ ले अगाडि रह्यो र ९ अंकको अन्तरले खेल जित्यो। नेपालका लागि यो समूह चरणको दोस्रो जित हो।

समूह चरणमा नेपालले यसअघि थाइल्यान्डलाई हराएको थियो भने चाइनिज ताइपेइसँग पराजित भएको थियो। समूह 'बी' बाट नेपाल र चाइनिज ताइपेइ अन्तिम चारमा पुगेका छन्। चाइनिज ताइपेइले समूहका तीनै खेल जित्दै सेमिफाइनल पुगेको छ।

कबड्डीको नियमअनुसार सेमिफाइनलमा पुग्ने टोलीले पदक पाउने व्यवस्था छ। नेपालले फाइनल प्रवेशका लागि शुक्रबार भारत वा इरानमध्ये एक टोलीसँग सेमिफाइनल खेल्नेछ। यो प्रतियोगितामा नेपालको दोस्रो पदक पक्का भएको हो।

यसअघि नेपालले करातेमा कांस्य पदक पाएको थियो। सन् २०२३ मा चीनमा भएको १९औँ एसियाली खेलकुदमा पनि नेपाली महिला कबड्डी टोलीले कांस्य पदक जितेको थियो। यसपटकको पदकसँगै टोली लगातार दोस्रो संस्करणमा पदक जित्ने भएको छ।