संविधान दिवसमा अमेरिका र भारतको शुभकामना, बाढी पुनर्लाभमा सघाउने अमेरिकी प्रतिबद्धता

संविधान दिवस तथा राष्ट्रिय दिवसका अवसरमा संयुक्त राज्य अमेरिका र भारतले नेपाललाई शुभकामना दिएका छन्। अमेरिकी विदेशमन्त्री मार्को रुबियोले विदेश मन्त्रालयमार्फत जारी गरेको सन्देशमा हालै भोटेकोशी क्षेत्रमा आएको बाढीका प्रभावितको उद्धार र पुनर्लाभमा सहयोग गर्ने प्रतिबद्धता जनाइएको छ। विज्ञप्तिअनुसार नेपाल र अमेरिकाबीचको कूटनीतिक सम्बन्ध करिब आठ दशक पुरानो भएको छ।

दुवै देशलाई फाइदा पुग्ने गरी व्यापार, नवप्रवर्तन र लगानीमा सहकार्य बढाउँदै साझेदारी थप मजबुत बनाउन अमेरिका तयार रहेको सन्देशमा उल्लेख छ। भारतका विदेशमन्त्री एस जयशंकरले सामाजिक सञ्जालमार्फत नेपालका परराष्ट्रमन्त्री शिशिर खनाल, नेपाल सरकार र नेपाली जनतालाई राष्ट्रिय दिवसको शुभकामना दिनुभएको छ। दुई देशबीचको गहिरो र लामो मित्रतालाई अझ बलियो बनाउन भारत प्रतिबद्ध रहेको उहाँले उल्लेख गर्नुभएको छ।

राष्ट्रपति रामचन्द्र पौडेलले आफ्नो शुभकामना सन्देशमा बाढी प्रभावितको राहत, उद्धार र पुनर्स्थापनाका लागि सबैलाई एकताबद्ध हुन आह्वान गर्नुभएको छ। संविधानले बहुजातीय, बहुभाषिक र बहुसांस्कृतिक समाजलाई समान संरक्षण दिएको पनि राष्ट्रपतिले उल्लेख गर्नुभएको छ।