प्रदेशहरूमा पनि संविधान दिवस, मुख्यमन्त्री र प्रदेश प्रमुखको कार्यान्वयनमा जोड

संविधान दिवसका अवसरमा आज प्रदेश सरकारहरूले पनि छुट्टाछुट्टै समारोह आयोजना गरेका छन्। विराटनगरको शहीद रङ्गशालामा आयोजित कार्यक्रममा कोशी प्रदेशका मुख्यमन्त्री हिक्मतकुमार कार्कीले संविधानको प्रभावकारी कार्यान्वयनले नै लोकतान्त्रिक गणतन्त्रलाई बलियो बनाउने बताउनुभएको छ। भ्रष्टाचार नियन्त्रण र सार्वजनिक सेवाको गुणस्तर सुधार प्रदेश सरकारको प्राथमिकतामा रहेको उहाँको भनाइ छ।

प्रदेश प्रमुख परशुराम खापुङ कार्यक्रममा प्रमुख अतिथिका रूपमा सहभागी हुनुहुन्थ्यो। वीरेन्द्रनगरमा भएको ११औँ संविधान तथा राष्ट्रिय एकता दिवस समारोहमा कर्णाली प्रदेश प्रमुख यज्ञराज जोशीले कर्णालीको विकास नभई देशको पूर्ण विकास सम्भव नहुने बताउनुभयो। मुख्यमन्त्री मङ्गलबहादुर शाहीले नागरिकलाई राज्यको अनुभूति दिलाउन तीनै तहका सरकारबीच समन्वय अपरिहार्य रहेको उल्लेख गर्नुभयो।

हेटौँडामा बागमती प्रदेश सरकारले आयोजना गरेको समारोहमा प्रदेश प्रमुख दीपकप्रसाद देवकोटाले संविधानलाई कानुनी दस्तावेज मात्र नभई जनताका सपना र आकाङ्क्षा झल्कने जीवन्त प्रणालीका रूपमा व्याख्या गर्नुभयो। उहाँले संविधानलाई न्यायपूर्ण र समतामूलक समाज निर्माणको मार्गचित्र पनि भन्नुभयो। पोखरामा गण्डकी प्रदेश प्रमुख डिल्लीराज भट्टले प्रदेशस्तरीय समारोहको उद्घाटन गर्नुभयो।

मुलुकले भोगिरहेको विषम परिस्थितिको समाधान संविधानको पूर्ण कार्यान्वयन, संवाद र सहकार्यबाट खोज्नुपर्ने लुम्बिनीका मुख्यमन्त्री चेतनारायण आचार्यले बताउनुभएको छ। गण्डकीका मुख्यमन्त्री सुरेन्द्रराज पाण्डे र सुदूरपश्चिमका मुख्यमन्त्री खगराज भट्टले पनि संविधानको कार्यान्वयनमा जोड दिनुभएको छ। सुनसरीको इनरुवामा जिल्ला समन्वय समितिको संयोजनमा प्रभातफेरी र रक्तदान कार्यक्रम आयोजना गरिएको थियो।