संविधान दिवस मूल समारोह: संविधानप्रति सरकार पूर्ण प्रतिबद्ध— प्रधानमन्त्री शाह

प्रधानमन्त्री वालेन्द्र शाहले संविधानको अक्षर र भावना दुवैको पालनामा सरकार पूर्ण रूपमा प्रतिबद्ध रहेको बताउनुभएको छ। संविधान दिवस तथा राष्ट्रिय दिवसका अवसरमा आज काठमाडौँको सैनिक मञ्च टुँडिखेलमा आयोजित मूल समारोहलाई सम्बोधन गर्दै उहाँले यस्तो बताउनुभएको हो। समारोहमा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानन्यायाधीश डा.

मनोजकुमार शर्मा, सभामुख डोलप्रसाद अर्याल र राष्ट्रिय सभाका अध्यक्ष नारायणप्रसाद दाहाल उपस्थित हुनुहुन्थ्यो। संविधान चलाउने हात इमानदार र निरन्तर सक्रिय नभए उत्कृष्ट संविधान पनि कागजमै सीमित हुने प्रधानमन्त्री शाहले बताउनुभयो। संविधान जारी गरिएको दिन प्रत्येक वर्ष आए पनि त्यसलाई पूर्णता दिने दिन इमानदार निर्णय र पारदर्शी नियुक्तिबाट ल्याउनुपर्ने उहाँको भनाइ छ।

बहुदलीय प्रतिस्पर्धात्मक लोकतन्त्र, मानव अधिकार र कानुनी राज्यलाई उहाँले सर्त होइन, राष्ट्रिय जीवनको आधारका रूपमा व्याख्या गर्नुभयो। उहाँका अनुसार भ्रष्टाचार र दण्डहीनताको जरा गहिरो भए पनि त्यसलाई उखेल्ने शक्ति अहिले झन् बलियो छ। विकासका लागि सुशासनलाई अनिवार्य पूर्वसर्त मान्दै सरकारले प्रशासनिक संरचनाको उपयुक्त आकार निर्धारण र भ्रष्टाचारमा शून्य सहनशीलताको नीति अपनाएको उहाँले जानकारी दिनुभयो।

'सुशासन नारा होइन, काम हो,' प्रधानमन्त्री शाहले भन्नुभयो। समारोहमा नेपाली सेना, नेपाल प्रहरी र सशस्त्र प्रहरी बलले मार्चपास प्रस्तुत गरेका थिए।