भोटेकोशी बाढीले पर्यटन क्षेत्रमा ५२ अर्बभन्दा बढी क्षति, पुनरुत्थान योजना बनाउन मन्त्रीको निर्देशन

रसुवाको भोटेकोशी नदीमा भदौ १० गते आएको बाढी र त्यसपछिको पहिरोले पर्यटन क्षेत्रमा करिब ५२ अर्ब ६७ करोड रुपैयाँ बराबरको प्रारम्भिक क्षति पुर्‍याएको एक प्रतिवेदनमा उल्लेख छ। संस्कृति, पर्यटन तथा नागरिक उड्डयन मन्त्रालयले बाढीपछि बनाएको द्रुत प्रतिक्रिया टोलीले सोमबार यो प्रतिवेदन पर्यटनमन्त्री खड्गराज पौडेललाई बुझाएको छ। टोलीको संयोजक नेपाल पर्यटन बोर्डका कार्यकारी सदस्य सहदेव धमला हुनुहुन्छ।

प्रतिवेदनअनुसार सबैभन्दा ठूलो क्षति होटल व्यवसायमा परेको छ, जुन करिब १९ अर्ब ५६ करोड रुपैयाँ बराबर छ। विदेशी पर्यटकबाट हुने आम्दानीमा करिब १४ अर्ब ६० करोड र पर्यटक व्यवस्थापनमा करिब १२ अर्ब २७ करोड रुपैयाँ बराबरको नोक्सानी आकलन गरिएको छ। सम्पदा, पर्यटन पूर्वाधार, सवारीसाधन र रेस्टुरेन्ट पनि क्षतिको सूचीमा छन्।

विशेषगरी रसुवा, नुवाकोट, धादिङ र गोरखामा होटल, पदमार्ग, सडक पहुँच र पर्यटक व्यवस्थापनमा ठूलो असर परेको छ। छलफलमा प्रभावित क्षेत्रको पर्यटन उद्योगलाई पुरानो अवस्थामा फर्काउन चाल्नुपर्ने तत्काल र दीर्घकालीन कदमबारे विचार भएको छ। त्यसपछि मन्त्री पौडेलले विपद्का बेला प्रभावकारी समन्वय र छिटो प्रतिकार्यसहितको विस्तृत पुनरुत्थान योजनाको मस्यौदा तयार पार्ने जिम्मा टोलीलाई दिनुभएको छ।

यसअनुसार प्रभावित पर्यटन क्षेत्रलाई पुनर्जीवित गर्न सरकारले विशेष कार्ययोजना अघि बढाउने भएको छ।