एमाले संविधान संशोधनको पक्षमा, संविधान पक्षधर शक्ति एक हुनुपर्छ: ओली

नेकपा एमालेका अध्यक्ष केपी शर्मा ओलीले आफ्नो पार्टी अझै संविधान संशोधनको पक्षमा रहेको बताउँदै संविधानका पक्षधर शक्तिहरू एकजुट हुनुपर्नेमा जोड दिनुभएको छ। शनिबार संविधान दिवसका अवसरमा ललितपुरको च्यासलस्थित पार्टी मुख्यालयमा भएको समारोहमा उहाँले संशोधन प्रतिगमनका लागि नभई अग्रगमनका लागि हुनुपर्ने बताउनुभएको छ। संविधान जारी भएलगत्तै देशले नाकाबन्दी झेल्नुपरेको स्मरण गर्दै उहाँले एमाले नेतृत्वको सरकारले छोटो समयमै कानुन बनाएर संविधान कार्यान्वयनको चरणमा पुर्‍याएको दाबी गर्नुभएको छ।

असोज ५ देखि ७ गतेसम्म बस्ने केन्द्रीय कमिटी बैठकले पार्टीभित्रका समस्या समाधान गर्ने र एमाले फेरि निर्णायक राष्ट्रिय शक्ति बन्ने ओलीले विश्वास व्यक्त गर्नुभएको छ। एमाले कुनै पनि तालले नसकिने दाबी गर्दै उहाँले पार्टीमा कमीकमजोरी भए पनि सुधार्दै अघि बढ्ने सामर्थ्य रहेको बताउनुभएको छ। सोही समारोहमा महासचिव शंकर पोखरेलले प्रधानमन्त्री बालेन्द्र शाहका लागि दलहरूसँगको संवाद 'एकादेशको कथा' जस्तै बनेको टिप्पणी गर्नुभएको छ।

प्रधानमन्त्री आफ्नै दलको बैठकमा नबस्ने र संसदप्रति जवाफदेही नबन्ने अवस्था संसदीय लोकतन्त्रमा पहिलोपटक देखिएको पोखरेलले दाबी गर्नुभएको छ। सरकार दलहरूसँग सहकार्य गर्नुको सट्टा स्वेच्छाचारी बाटोतर्फ लागेको उहाँले बताउनुभएको छ। जेन–जी आन्दोलनको जगमा बनेको भनिए पनि सरकारले त्यस आन्दोलनको उद्देश्य अपहरण गरेको पोखरेलको आरोप छ।