रास्वपा सचिवालयको निर्देशन: महासभामा भोटेकोशी विपद्को विषय उठाउनू

सत्तारूढ राष्ट्रिय स्वतन्त्र पार्टीले संयुक्त राष्ट्रसङ्घको महासभामा भोटेकोशी विपद्सँग जोडिएका बहुआयामिक पक्ष उठाउन सरकारलाई नीतिगत निर्देशन दिएको छ। सभापति रवि लामिछानेको अध्यक्षतामा आइतबार केन्द्रीय कार्यालयमा बसेको सचिवालय बैठकले महासभामा सहभागी हुन जाने प्रधानमन्त्री बालेन्द्र शाह, परराष्ट्रमन्त्री शिशिर खनालसहितको कार्यदललाई बदलिँदो राजनीतिक परिस्थिति, समृद्धि, अन्तर्राष्ट्रिय सम्बन्ध र विश्वमञ्चमा नेपालको भूमिकामा सम्बोधन केन्द्रित गर्न भनेको हो। महासभामा भाग लिन परराष्ट्रमन्त्री खनाल आइतबार अमेरिका प्रस्थान गर्नुभएको छ भने प्रधानमन्त्री शाह मङ्गलबार जाने कार्यतालिका छ।

बैठकले रसुवाको भोटेकोशी बाढीपछिको राहत, पुनर्निर्माण तथा पुनर्स्थापनाको काम थप प्रभावकारी बनाउन सरकारलाई आग्रह गरेको छ। यी काम समानान्तर रूपमा अघि बढिरहेको जानकारी सरकारका प्रतिनिधिले बैठकमा गराएका थिए। विपद्का कारण स्थगित गरिएका पार्टीका सम्पूर्ण गतिविधि पुनः सुचारु गर्ने निर्णय भएको प्रवक्ता जगदीश खरेलले बताउनुभएको छ।

यसअन्तर्गत ‘हामी सुन्छौँ’ र ‘नागरिक नीति र नेतृत्व’ अभियान पुनः सञ्चालन हुनेछन्। बैठकले केन्द्रीय अनुशासन आयोगको सदस्यमा हरिचन्द्र भट्टराई, सुशीला सिंखडा, रामचन्द्र कार्की र शान्ता थापालगायत अधिवक्ता मनोनयन गरेको छ। मधेस प्रदेशको साङ्गठनिक अवस्था र कार्यसम्पादन अडिटको प्रतिवेदनमाथि छलफल गरी आवश्यक रणनीतिक कदम अघि बढाउने निर्णय पनि भएको छ।

सभापति लामिछानेले पार्टी, संसद् र सरकारबीचको अन्योन्याश्रित सम्बन्ध सुदृढ बनाउन निर्देशन दिनुभएको छ।