कांग्रेसमा अब कुनै गुट छैन: सभापति थापा, नयाँ नेतृत्व चयनका लागि बिहीबार मतदान

नेपाली कांग्रेसका सभापति गगनकुमार थापाले पार्टीभित्रका सबै गुट र समूह समाप्त भएको घोषणा गरेका छन्। १५औँ महाधिवेशनअन्तर्गत बुधबार काठमाडौँको खुलामञ्चमा भएको बन्दसत्र समापन कार्यक्रममा बोल्दै उनले आफ्नो नाममा कसैलाई पनि मतदानको ‘चिट’ नबाँड्न आग्रह गरे।

थापाले निवर्तमान सभापति शेरबहादुर देउवाले पार्टीमा गरेको योगदान बिर्सन नसकिने बताए। सबै नेता महाधिवेशनमा सहभागी हुन नसकेकोमा आफूहरूलाई खुसी नलागेको भन्दै उनले भने, ‘यो मञ्चमा हाम्रा दाइहरू पनि हुनुपर्थ्यो।’ उनले संस्थापन इतर समूहका नेताहरूलाई अदालत धाउने काम बन्द गरी एकताबद्ध हुन आह्वान गरे। बन्दसत्रले उपसभापति विश्वप्रकाश शर्माले पेस गरेको समसामयिक विषयसम्बन्धी प्रस्ताव पनि पारित गरेको छ।

सभापति पदका उम्मेदवार किशोरसिंह राठौरले उम्मेदवारी फिर्ता लिँदै थापालाई समर्थन गरेका छन्। अर्का उम्मेदवार श्यामकृष्ण खड्गीले भने बुधबार आफ्नो उम्मेदवारी कायमै रहेको बताएका छन्।

नयाँ केन्द्रीय कार्यसमिति चयनका लागि बिहीबार बिहान १० बजेदेखि अपराह्न ५ बजेसम्म मतदान हुनेछ। महाधिवेशनमा सहभागी ७ हजार २५५ प्रतिनिधिले मतदान गर्नेछन्। निर्वाचन समितिले राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकेको छ।