जलवायु नीति २०८३: ४० भन्दा बढी संस्थाले मन्त्री चौधरीलाई सुझाव बुझाए

कृषि, वन तथा पर्यावरणमन्त्री गिता चौधरीलाई प्रस्तावित जलवायु नीति २०८३ बारे ४० भन्दा बढी संघसंस्थाले सुझाव बुझाएका छन्। बुधबार मन्त्रालयमा नागरिक समाजका प्रतिनिधि, अक्सफाम र गैरसरकारी संस्था महासंघ नेपाललगायतले सुझाव र सल्लाह प्रस्तुत गरेका हुन्। सुझाव ग्रहण गर्दै मन्त्री चौधरीले सरोकारवालाका सुझाव गहिराइसँग अध्ययन गरी आवश्यक छलफल गरेपछि मात्र नीति अघि बढाइने बताउनुभएको छ।

उहाँका अनुसार नीति निर्माणमा युवाको सहभागिता, समावेशिता र विभिन्न क्षेत्रको अर्थपूर्ण संलग्नतालाई प्राथमिकता दिँदै युवाको भूमिका सुनिश्चित गरिनेछ। जलवायु परिवर्तनको मार खेपिरहेको मुलुकका रूपमा नेपालले आफ्नो अनुभव, ज्ञान र प्राथमिकता अन्तर्राष्ट्रिय मञ्चमा प्रभावकारी ढंगले राख्नुपर्ने उहाँको भनाइ छ। जलवायु परिवर्तनका मुद्दामा नेपालले अगुवाइ गर्ने भूमिका निर्वाह गर्नुपर्नेमा पनि मन्त्री चौधरीले जोड दिनुभएको छ।