कांग्रेस महाधिवेशनमा मतदान, समय साँझ ५ बजेसम्म थपियो

नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चुन्न भइरहेको मतदानको समय दुई घण्टा थप गरिएको छ। केन्द्रीय निर्वाचन समितिका सदस्यसचिव राजु कटुवालले जारी गरेको सूचनाअनुसार दिउँसो ३ बजे सकिने भनिएको मतदान अब साँझ ५ बजेसम्म चल्नेछ। एक जना प्रतिनिधिलाई मत हाल्न कम्तीमा आधा घण्टा लाग्ने र केन्द्रहरूमा लामो लाइन लागेकाले समय बढाइएको हो।

सभापति, उपसभापति, महामन्त्री, सहमहामन्त्री र केन्द्रीय सदस्यसहित २३ वटा क्लस्टरमा मत दिनुपर्ने भएकाले प्रक्रिया लम्बिएको हो। निर्वाचन समितिका अनुसार दिउँसो साढे २ बजेसम्म करिब ७ हजार ३ सय प्रतिनिधिमध्ये करिब ३ हजार ७ सय ५० जनाले मतदान गरिसकेका छन्। दिउँसो साढे १२ बजेसम्म यो सङ्ख्या करिब २ हजार ६ सय थियो।

बागमती प्रदेशका प्रतिनिधिले राष्ट्रिय सभा गृहमा र अन्य प्रदेशका प्रतिनिधिले खुलामञ्चलगायतका केन्द्रमा मत खसालिरहेका छन्। साढे २ बजेसम्म बागमतीबाट करिब ७ सय ३० र सुदूरपश्चिम, कर्णाली तथा जनसम्पर्क समितिबाट पनि करिब ७ सय ३० मत खसेको थियो।