काठमाडौंमा साउदी अरबको ९६औँ राष्ट्रिय दिवस

साउदी अरबको ९६औँ राष्ट्रिय दिवसका अवसरमा काठमाडौँमा विशेष कूटनीतिक समारोह आयोजना गरिएको छ। नेपालका लागि साउदी अरबका राजदूत फहद मोहम्मद ए म्निखरले आयोजना गर्नुभएको सो समारोहमा संस्कृति, पर्यटन तथा नागरिक उड्डयनमन्त्री खडकराज पौडेल प्रमुख अतिथिका रूपमा सहभागी हुनुभएको थियो। समारोहमा मन्त्रिपरिषद्का सदस्य, नेपाल सरकारका उच्च अधिकारी, विभिन्न मुलुकका कूटनीतिक नियोगका प्रमुख तथा प्रतिनिधि, वरिष्ठ सञ्चारकर्मी र समाजका प्रतिष्ठित व्यक्तित्वको उपस्थिति रहेको थियो।

साउदी अरबका मित्रराष्ट्रका प्रतिनिधिको समेत सहभागिता थियो। समारोहलाई सम्बोधन गर्दै राजदूत म्निखरले राजा अब्दुलअजिज बिन अब्दुर्रहमान अल साउदले एकीकरण गर्नुभएको मुलुकले पुस्तौँदेखि आफ्ना मूल्य, पहिचान र परम्पराको संरक्षण गर्दै प्रगतिपथमा अग्रसर भएको बताउनुभएको छ। उहाँले उपस्थित अतिथिलाई शुभकामना समेत व्यक्त गर्नुभएको छ।

यस वर्ष साउदी अरबले ‘हाम्रो गौरव हाम्रो प्रकृतिमा’ भन्ने मूल सन्देशका साथ राष्ट्रिय दिवस मनाएको हो। नेपाल र साउदी अरबबीच सन् १९७७ मा औपचारिक कूटनीतिक सम्बन्ध स्थापना भएको थियो। साढे चार दशकभन्दा लामो अवधिमा दुई मुलुकबीचको मैत्रीपूर्ण सम्बन्ध, आपसी सहकार्य र समझदारी थप प्रगाढ बन्दै गएको छ।

नेपाल राष्ट्र बैंकका अनुसार एक साउदी रियालको खरिद दर ४०.६५ रुपैयाँ र बिक्री दर ४०.८१ रुपैयाँ कायम छ।