कांग्रेस: ६३० पालिकामा अधिवेशन सकियो, महाधिवेशनको नारा र लोगो सार्वजनिक

नेपाली कांग्रेसले १५औँ महाधिवेशनअन्तर्गत ६६ जिल्लाका ६३० पालिकामा अधिवेशन सम्पन्न गरेको छ। केन्द्रीय निर्वाचन समितिका अनुसार देशभरका ७५३ पालिकामध्ये यति स्थानमा निर्वाचन सकिएको हो। भारी वर्षाले अधिवेशन प्रक्रियामा कठिनाइ भएको जानकारी निर्वाचन अधिकृतहरूबाट आएको पार्टी केन्द्रीय कार्यालयले जनाएको छ।

यसैकारण असोज १० गतेका लागि तोकिएका प्रदेशसभा र प्रतिनिधिसभा क्षेत्रीय अधिवेशन मौसम अनुकूल क्षेत्रमा तोकिएकै दिन र प्रतिकूल क्षेत्रमा असोज १३ भित्र गर्न समितिले निर्देशन दिएको छ। समितिका सदस्य सचिव राजु कटुवालले विज्ञप्तिमार्फत सम्बन्धित जिल्ला र क्षेत्रीय कार्यसमितिसँग समन्वय गरी व्यवस्था मिलाउन भन्नुभएको छ। प्रतिकूल मौसमकै कारण ओखलढुङ्गा र खोटाङ जिल्ला कार्यसमितिले क्षेत्रीय अधिवेशन स्थगित गरेका छन्।

कांग्रेसले बिहीबार सामाजिक सञ्जालमार्फत महाधिवेशनको नारा र लोगो सार्वजनिक गरेको छ। नारामा 'परम्पराको सम्मान, परिवर्तनको संकल्प' सहित समुन्नत नेपालका लागि सबल कांग्रेसलाई अबको विकल्पका रूपमा प्रस्तुत गरिएको छ। लोगोमा बीपी कोइरालादेखि सुवर्णशमशेर, गणेशमान सिंह, कृष्णप्रसाद भट्टराई, गिरिजाप्रसाद कोइराला, सुशील कोइराला र शेरबहादुर देउवासम्मका तस्बिर राखिएका छन्।

महाधिवेशन असोज १६ देखि १९ गतेसम्म काठमाडौँको खुलामञ्चमा हुनेछ। यसैबीच पूर्वसभापति देउवा पक्षले असोज १५ देखि वडा अधिवेशन सुरु गर्ने गरी छुट्टै कार्यतालिका अघि सारेको छ। पूर्वमहामन्त्री डा.

शशाङ्क कोइराला संयोजक रहेको उक्त समूहले मङ्सिर २१ देखि २३ सम्म महाधिवेशन गर्ने जनाएको छ।