रास्वपा: आफूखुसी उम्मेदवारी घोषणा गर्नेलाई कारबाहीको चेतावनी; लामिछाने छठमा जनकपुर

राष्ट्रिय स्वतन्त्र पार्टी, रास्वपाका सभापति रवि लामिछानेले यस वर्षको छठ पर्व राष्ट्रिय एकताको सन्देशसहित जनकपुरधामको गंगासागरमा मनाउने जानकारी दिनुभएको छ। सामाजिक सञ्जालमार्फत तिहार, नेपाल संवत् र छठको शुभकामना दिँदै उहाँले यी पर्वले परिवार, समाज र समुदायबीचको प्रेम, सद्भाव र विश्वास बलियो बनाउने विश्वास व्यक्त गर्नुभएको छ। विविधताबीचको राष्ट्रिय एकता अझ सुदृढ होस् भन्ने कामना पनि सभापति लामिछानेले गर्नुभएको छ।

सबैको जीवनमा सुख, शान्ति, समृद्धि र नयाँ आशा आओस् भन्ने शुभेच्छा पनि उहाँले दिनुभएको छ। यसैबीच, स्थानीय तह निर्वाचनका लागि पार्टीको औपचारिक निर्णयबिनै उम्मेदवारी घोषणा गर्नेलाई रास्वपाको कोशी प्रदेश समितिले कारबाहीको चेतावनी दिएको छ। प्रदेश महामन्त्री निरज कटुवालले जारी गर्नुभएको अत्यन्त जरुरी सूचनामा 'क्यान्डिडेट क्लब'मा आवेदन दिँदैमा उम्मेदवारी पक्का नहुने उल्लेख छ।

छनोट प्रक्रिया नसकिँदै सामाजिक सञ्जाललगायतका माध्यमबाट आफूलाई पार्टीको उम्मेदवार भनी प्रचार गर्ने काम रोक्न समितिले निर्देशन दिएको छ। यस्तो गरे पार्टीको विधान र आचारसंहिताअनुसार कारबाही हुने सूचनामा जनाइएको छ। निर्देशन नमान्नेलाई छनोट प्रक्रियाबाट निष्कासन, जिम्मेवारीबाट हटाउने र साधारण सदस्यतासमेत खारेज गर्नेसम्मको कारबाही हुन सक्ने समितिले स्पष्ट पारेको छ।