आईपीओ निष्कासनका लागि नयाँ योग्यता मापदण्ड तयार

नेपाल धितोपत्र बोर्डले साधारण शेयर अर्थात् आईपीओ जारी गर्न चाहने कम्पनीका लागि नयाँ योग्यता तोक्ने भएको छ। बोर्डले सार्वजनिक निष्कासनको सामान्य योग्यता सम्बन्धी निर्देशिका, २०८३ को मस्यौदा तयार पारेको हो। लगानीकर्ताको हित संरक्षण गर्दै निष्कासन प्रक्रियालाई विश्वसनीय र पारदर्शी बनाउने उद्देश्य रहेको बोर्डका अधिकारीहरूले बताएका छन्।

मस्यौदाले कम्पनीको वित्तीय स्वास्थ्य, संस्थागत सुशासन, सञ्चालन तयारी र संस्थापकको योग्यतालाई अनुमतिको मुख्य आधार बनाएको छ। बोर्डका अनुसार आईपीओमा जान चाहने कम्पनीको प्रतिशेयर खुद सम्पत्ति चुक्ता मूल्यभन्दा कम हुनु हुँदैन। कम्तीमा तीन आर्थिक वर्षको लेखापरीक्षण भएको वित्तीय विवरणसहितको वार्षिक प्रतिवेदन अनिवार्य हुने व्यवस्था मस्यौदामा छ।

कम्पनीले आफ्नो आधिकारिक वेबसाइट सञ्चालनमा ल्याई त्यस्तो विवरण सार्वजनिक गरेको हुनुपर्नेछ। कम्पनीमा कसको कति लगानी छ भन्ने विवरण पनि वेबसाइटमा खुलाउनुपर्ने प्रस्ताव छ। संस्थापक र सञ्चालकको फिट एन्ड प्रपर टेस्ट गर्ने व्यवस्था पनि मस्यौदामा राखिएको छ।

आईपीओबाट उठेको रकम छुट्टै खातामा राख्नुपर्ने प्रस्ताव गरिएको छ। कम्पनीले त्रैमासिक तथा वार्षिक प्रतिवेदन बुझाउनुपर्ने व्यवस्था पनि मस्यौदामा छ। झुट्टा वा भ्रामक विवरण पेस गरेमा स्वीकृति रद्द वा स्थगन गर्न सकिने उल्लेख छ।