नीति र सिद्धान्तका आधारमा वामपन्थी एकता हुनुपर्छ: झलनाथ खनाल

नेपाल कम्युनिस्ट पार्टीका वरिष्ठ नेता एवं पूर्वप्रधानमन्त्री झलनाथ खनालले देश जोगाउन वामपन्थी एकता अनिवार्य रहेको बताउनुभएको छ। काठमाडौँमा राष्ट्रिय जनमोर्चाका महासचिव मनोज भट्टद्वारा लिखित ‘सहकारी ठगीको जालो’ पुस्तकको विमोचन कार्यक्रममा बोल्दै उहाँले यस्तो धारणा राख्नुभएको हो। वामपन्थी आन्दोलन कमजोर हुँदै गएकाले देश अस्थिरता र अनिश्चितताको अवस्थामा पुगेको उहाँको दाबी छ।

नेताहरूको टाउको जोडेर मात्र एकता नहुने भन्दै उहाँले नीति, सिद्धान्त र आदर्शका आधारमा मात्र एकता दिगो हुने उल्लेख गर्नुभएको छ। ‘राष्ट्रियता गम्भीर मोडमा पुगेको छ, त्यसलाई जोगाउन सबै वामपन्थीबीच एकता अनिवार्य छ,’ खनालले भन्नुभयो। कम्युनिस्ट आन्दोलनले सुरुदेखि आफूलाई सबैभन्दा देशभक्त आन्दोलन दाबी गरे पनि आफ्नै गल्ती र सम्झौताका कारण राष्ट्रियता कमजोर बनेको उहाँले औंल्याउनुभएको छ।

राष्ट्रिय मुद्दा समाधान गर्न छरिएका वामपन्थी शक्ति एक ठाउँमा आउनुपर्ने उहाँको जोड छ। हतारमा पद मिलाएर गरिने एकता दिगो नहुने पनि उहाँले बताउनुभएको छ। वामपन्थी शक्तिबीच सँगै अघि बढ्ने न्यूनतम एकताको संस्कारसमेत नभएको उहाँको भनाइ छ।

राजनीतिक एकताको स्पष्ट आधार तय गर्नुपर्ने आवश्यकतामा उहाँले जोड दिनुभएको छ। सहकारी क्षेत्रलाई बलियो बनाउन आवश्यक पहल गर्नुपर्ने उहाँले सोही कार्यक्रममा बताउनुभएको छ।