अस्ट्रेलियाले विद्यार्थी भिसामा बैंक ब्यालेन्स दोब्बर बनाउने प्रस्ताव

अस्ट्रेलियाले अन्तर्राष्ट्रिय विद्यार्थीले भिसाका लागि देखाउनुपर्ने बैंक मौज्दात दोब्बर बनाउने प्रस्ताव अघि सारेको छ। अस्ट्रेलियाको गृह मामिला विभागले अक्टोबर ३० मा सार्वजनिक गरेको छलफलपत्रमा आर्थिक क्षमता पुष्टि गर्ने चारवटा विकल्प राखिएको छ। तीमध्ये तीनवटा विकल्पमा अध्ययन र बसोबासका लागि चाहिने रकम अस्ट्रेलियाकै बैंक खातामा जम्मा गरेको प्रमाण दिनुपर्नेछ।

यस्तो रकम पूरै अध्ययन अवधिको शुल्क र जीवनयापन खर्चको ५० प्रतिशत, वा पहिलो वर्षको पूरा शुल्क र जीवनयापन खर्च बराबर हुन सक्छ। केही विकल्पमा यो रकम आवेदन दिनुभन्दा एकदेखि तीन महिनाअघि नै खातामा रहेको हुनुपर्नेछ। मान्यताप्राप्त शैक्षिक ऋण, छात्रवृत्ति र व्यक्तिगत बचतबाट पनि क्षमता देखाउन सकिने प्रस्ताव छ।

अध्ययन अवधि र शुल्क हेरेर विद्यार्थीले करिब १ लाख ४० हजार अस्ट्रेलियाली डलरसम्म देखाउनुपर्ने हुन सक्छ। नेपाल राष्ट्र बैंकले कात्तिक १५ गतेका लागि तोकेको अस्ट्रेलियाली डलरको खरिद दरअनुसार यो रकम करिब १ करोड ४९ लाख रुपैयाँ हुन्छ। हाल विद्यार्थीले ट्युसन शुल्क, १२ महिनाको जीवनयापन र यात्रा खर्चको स्रोत देखाए पुग्छ।

नयाँ व्यवस्थामा रकमको स्रोत, त्यो कसको नाममा छ र विद्यार्थीले चलाउन पाउँछ कि पाउँदैन भन्ने पनि जाँचिनेछ। वास्तविक विद्यार्थी पहिचान गर्ने प्रक्रियामा पनि परिवर्तन प्रस्ताव गरिएको छ।