माइतीघरमा धर्नारत दलित अधिकारकर्मीलाई संवादमा आउन मन्त्रालयको आग्रह

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले माइतीघर मण्डलामा धर्नारत दलित अधिकारकर्मीलाई धर्ना अन्त्य गरी संवादमा आउन आग्रह गरेको छ। उनीहरू दलित समुदायका हकअधिकारसम्बन्धी विभिन्न माग राख्दै धर्नामा बसेका छन्। प्रेस विज्ञप्ति जारी गर्दै मन्त्रालयले उठाइएका मागप्रति सरकार गम्भीर र संवेदनशील रहेको जनाएको छ।

जातीय तथा अन्य सामाजिक छुवाछूत र भेदभाव (कसुर र सजाय) ऐन, २०६८ लाई समयानुकूल बनाउन संशोधन गर्ने विषयमा सरकार सकारात्मक रहेको विज्ञप्तिमा उल्लेख छ। छुवाछूत र जातीय विभेदका घटना प्रभावकारी ढङ्गले सम्बोधन गर्न कानुनी पहल गर्ने प्रतिबद्धता पनि मन्त्रालयले व्यक्त गरेको छ। मन्त्रालयका अनुसार दलित समुदायको अधिकार संरक्षण र विकाससम्बन्धी विधेयकको मस्यौदा तयार भइसकेको छ।

सुधारमुखी कार्यक्रमको घोषणा र दलितको परिभाषा तथा सूचीकरणको काम पनि अघि बढाइएको मन्त्रालयले जनाएको छ। संवैधानिक हकको संरक्षण, छुवाछूतको अन्त्य र समतामूलक समाज निर्माणप्रति मन्त्रालय प्रतिबद्ध रहेको विज्ञप्तिमा उल्लेख छ।