जाडो सुरु हुँदा पूर्वी तराईमा भक्काको बिक्री बढ्यो

जाडो सुरु भएसँगै झापा, मोरङ र सुनसरीलगायत पूर्वी तराईका जिल्लामा परम्परागत खाजा भक्काको बिक्री बढेको छ। राजवंशी भाषामा भक्का भनिने यो आदिवासी समुदायको परिकार अहिले सबै उमेर र समुदायमाझ लोकप्रिय भएको छ। चामलको पिठो बाफमा पकाएर बनाइने भक्का ताजा सालको पातमा पिरो अचारसँग खाइन्छ।

मेचीनगर–१५ की जगनी राजवंशीले करिब एक दशकदेखि धुलाबारी मोडमा दैनिक भक्का बेच्दै आउनुभएको छ। उहाँ बिहान करिब ५ बजे भाँडा, चुलो, दाउरा र सालका पात बोकेर घरबाट करिब २ किलोमिटर टाढाको बजार पुग्नुहुन्छ। उहाँका अनुसार दिनहुँ करिब १० किलो चामलको पिठोको भक्का बिक्री हुन्छ र त्यसको आम्दानीले परिवार धान्न पुग्छ।

जल तथा मौसम विज्ञान विभागका अनुसार विराटनगरमा बिहानपख हुस्सु लाग्ने र तापक्रम १९ देखि २१ डिग्री सेल्सियस रहनेछ।