विपद् अध्ययनका लागि राष्ट्रिय सभामा पनि समिति, प्रतिनिधिसभा समितिको कार्यविधि पारित

राष्ट्रिय सभाले भोटेकोशी र कालीगण्डकी करिडोरमा आएको विपद्को अध्ययन र अनुगमनका लागि नौ सदस्यीय विशेष संसदीय समिति बनाएको छ। अध्यक्ष नारायणप्रसाद दाहालको प्रस्तावमा बिहीबारको बैठकले समिति गठन गरेको हो। समितिमा गीता देवकोटा, घनश्याम रिजाल, सोमनाथ पोर्तेल र पूजा चौधरीलगायत सदस्य छन् भने एक सदस्य पछि थपिनेछ।

गत भदौ १० गते भोटेकोशी र असोज ९ देखि ११ गतेसम्म कालीगण्डकीमा आएको बाढीबाट भएको क्षतिको अध्ययन समितिले गर्नेछ। छिमेकी देशसँग विपद् व्यवस्थापन र पूर्वसूचना प्रणालीमा सहकार्य गर्ने तथा विज्ञसँग छलफल गरेर जोखिम घटाउने उपाय पहिचान गर्ने कार्यादेश समितिलाई दिइएको छ। समितिले दीर्घकालीन जोखिम न्यूनीकरणको मार्गचित्र पनि सिफारिस गर्नेछ।

यता, प्रतिनिधिसभाको भोटेकोशी–त्रिशूली विपद् तथा हिमालमा जलवायु परिवर्तनसम्बन्धी विशेष समितिले बिहीबार आफ्नो आन्तरिक कार्यविधि पारित गरेको छ। सदस्यहरूका सुझावअनुसार परिमार्जन गरेर कार्यविधि पारित गरिएको सभापति गणेश पराजुलीले जानकारी दिनुभएको छ। बैठकमा केही सदस्यले गोप्य बैठकसम्बन्धी व्यवस्था र सभापतिलाई दिइएको व्याख्या गर्ने अधिकारबारे प्रश्न उठाएका थिए।

समितिको कार्यादेशमाथि भने अर्को बैठकमा छलफल हुनेछ। सभापति पराजुलीले विषयगत विज्ञ सांसदलाई आमन्त्रित सदस्य बनाउन दलहरूसँग नाम माग्नुभएको छ। समितिको अर्को बैठक शुक्रबार दिउँसो ३ बजे बोलाइएको छ।