विदेशीको आवासीय भिसा अर्कै विदेशीको नाममा, अध्यागमनका कम्प्युटर अपरेटरविरुद्ध मुद्दा

अध्यागमन विभागका एक कम्प्युटर अपरेटरले लक्जेम्बर्गका नागरिकको नाममा रहेको भिसा अनधिकृत तरिकाले परिवर्तन गरी अमेरिकी नागरिकको नाममा जारी गरेको भेटिएको छ।

नेपाल प्रहरीको केन्द्रीय अनुसन्धान ब्युरो (सीआईबी) को अनुसन्धानपछि ती कम्प्युटर अपरेटरविरुद्ध किर्ते अभियोगमा मुद्दा दायर गरिएको हो। स्रोत समाचारहरूका अनुसार परिवर्तन गरिएको भिसा आवासीय भिसा थियो।

एक विदेशी नागरिकका नाममा रहेको आवासीय भिसा अर्का विदेशी नागरिकको नाममा सारिएको आरोप छ। अध्यागमन विभागको प्रणालीमा अनधिकृत पहुँच र प्रयोग गरी यस्तो काम गरिएको अनुसन्धानमा देखिएको जनाइएको छ।

अभियोग लागेका कम्प्युटर अपरेटरको नाम भने सार्वजनिक गरिएको छैन। घटनाबारे थप अनुसन्धान र मुद्दाको कारबाही अघि बढ्ने जनाइएको छ।